GRONDBONE: MARK VIR BOTTER GROEI

DIE plaaslike mark vir grondboonbotter het verlede jaar beduidend gegroei. Die 27 641 ton wat verlede jaar verbruik is, is 15% meer as in 2005, sê mnr. Wandile Sihlobo, hoof van ekonomiese en landbousake-inligting van die landbousakekamer Agbiz.

Oor ‘n langer tydperk het die mark vir grondboonbotter relatief stabiel op 24 000 ton per jaar gebly, terwyl die mark vir die neute self weens verbruikers se pryssensitiwiteit kleiner geword het.

Sihlobo het in ‘n inligtingstuk gesê die mark vir neute het van 2005 tot 2011 redelik dieselfde gebly, maar vanaf 2012 tot 2015 met 46% gekrimp weens stygende pryse. Die prys van Suid-Afrikaanse keurgraadgrondbone het van 2000 tot 2010 met 57% gestyg.

Internasionale pryse het in dieselfde tyd met sowat 45% gestyg, sê Sihlobo.

Van 2010 tot vroeg 2016 het internasionale pryse met slegs 5% gestyg, terwyl plaaslike pryse vir keurgraad-grondbone met 109% van R5 500/ton tot R11 500/ton gestyg het.

Internasionaal het grondboonboere hul produksie tussen 2010 en 2014 met sowat 5% verhoog, maar in Suid-Afrika het produksie oor ‘n aantal jare gedaal.

Sihlobo sê die totale grondboon-oes sal vanjaar na verwagting weens die droogte op ‘n jaargrondslag met 49% tot 31 600 ton daal.

– CARIEN KRUGER