Boere as aktiviste
’N MAN vir wie Manie oor baie jare groot respek gekry het, het verlede week goeie raad vir Suid-Afrikaanse boere gehad.
Brand Pretorius, wat as uitvoerende hoof van McCarthy Beperk die motorreus in die vroeë 2000’s van geldelike ondergang gered het, het op Agri Noordwes se jaarlikse kongres op Lichtenburg gepraat oor ’n omdraai-strategie vir die landbou vanuit ’n besigheidsperspektief.
Hy sê boere moet nie passief wees nie, maar konstruktiewe aktiviste word wat uit een mond praat. Die feit dat die landbou nie met een stem praat nie, skep vir boere ’n vyandige omgewing.
’n Mens mag maar na hom luister. Toe hy in 2001 die leisels by McCarthy oorgeneem het, was die maatskappy tegnies insolvent met 15 000 werknemers wat hul werk sou verloor het, en R1,5 miljard skuld aan banke. Ná drie jaar was die maatskappy skuldvry en 8 000 werksgeleenthede is gered.
“In die motorbedryf het ons gaan kyk na voorbeelde in ander lande en besluit om met een stem met die Regering te onderhandel. Ons het gesê ons sal beleggings lok en werk skep, en die Regering het geluister en ’n gunstige beleidsomgewing geskep,” vertel hy.
Die resultaat was dat oor die afgelope tien jaar meer as R50 miljard in die plaaslike motorbedryf belê is. Vanjaar sal 600 000 voertuie in Suid-Afrika gebou word. Daarvan is 370 000 vir die buiteland bestem, sê hy.
Pretorius sê boere leef in ’n komplekse, uitdagende omgewing. “Twee belangrike gevolgtrekkings is dat dit moeilik is om die toekoms akkuraat te bepaal en dat dinge nog nooit so vinnig so ingrypend verander het soos deesdae nie.”
Daarom lê die uitdaging daarin om aan te pas by die veranderende omgewing, maar terselfdertyd te bly presteer in ’n hoogs mededingende wêreld. “Dit is ’n nuwe normaal. Ons kan nie wag vir die storm om verby te gaan nie. Ons sal moet leer om in die reën te dans.”
STOP DIE NONSIES!
So van saamstaan gepraat. Manie help om ’n waterinligtingsdag by die Agri Megaweek by Bredasdorp te reël. Hy kry toe ’n uitstekende spreker in die hande wat kan praat oor die voorste tegnologie wat die Suid-Kaapse graanboer kan help om baie doeltreffender met water te werk – ’n senior direkteur by die Wes-Kaapse departement van landbou.
’n Paar dae later laat weet die man hy kan nie meer praat nie – niemand in die departement mag Agri Megaweek bywoon nie.
By navraag bevestig ’n woordvoerder van die departement toe dat die departement inderdaad nie meer by Agri Megaweek betrokke is nie. En, voeg hy by, hy kan niks verder sê nie, want daar kom regsaksie tussen die departement en Agri Megaweek se organiseerders.
Nou Manie weet nie wat die . . . amper sê Manie k*k . . . is nie en Manie stel ook nie belang nie. Maar Manie wil net vir die betrokke partye sê, sorteer julle nonsies uit, want die landbou kan nie sulke kinderagtighede bekostig nie!