KLEINHANDEL- EN KARKASPRYSE KLOP WEL – NAVORSERS

KLEINHANDELAARS skep nié kunsmatig hoë rooivleispryse nie, is in ’n studie deur die department landbou-ekonomie aan die Universiteit van die Vrystaat bevind.

In die navorsing, na aanleiding van bewerings in die bedryf dat kleinhandelaars pryse manipuleer, is bevind daar is wel ’n langtermynverhouding tussen karkas- en kleinhandelpryse.

Drie navorsers, mnre. Herman Lombard en Frikkie Maré en dr. Abiodun Ogundeji, het die karkas- en kleinhandelpryse van drie supermarkte en ’n slaghuis oor drie jaar ontleed.

Geen ernstige prystransmissieprobleme is in die rooivleismark gevind nie en ook nie prysvasstelling tussen kleinhandelaars nie. Ander bevindinge was: Kleinhandelaars in verskillende gebiede se marges op dieselfde snit verskil dikwels na gelang van die LSM-mark wat hulle bedien; Kleinhandelaars wissel eerder die pryse van goedkoper snitte as van duurder snitte, aangesien dieselfde persentasie verandering ’n groter invloed op die prys van duurder as goedkoper snitte het en dan makliker verbruikers afskrik.

GEHEEL

Maré het aan Landbouweekblad gesê individuele snitte gee nie ’n geheelbeeld nie.

“Indien ’n mens slegs na die prys van een kleinhandelsnit kyk, byvoorbeeld die prys van filet-steak of lamsrugtjoppies, word die prysverhouding tussen die karkas- en kleinhandelprys dikwels nie konstant gehou nie.”

As ’n mens egter ’n paar snitte van die karkas, elk in verhouding tot hul bydrae van die totale karkas, gebruik om prystransmissie te ontleed, volg die kleinhandelprys wél dieselfde prysneigings as die karkasprys.

“In die FIGUUR kom dit ook duidelik na vore. Daar kan oor ’n periode van drie jaar gesien word dat hoewel die filetprys nie noodwendig die karkasprys noukeurig volg nie, die saamgestelde karkasprys van die kleinhandel wel saam met die karkasprys wat die produsent ontvang, beweeg,” sê sy. VERHOUDING VAN DIE KARKAS-, SUPERMARK- EN FILETPRYS TOT MEKAAR OOR DRIE JAAR. Die studie het ook bevind dat prysinligting in die mark in albei rigtings vloei. Die kleinhandel beïnvloed dus die karkasprys, en andersom.

“Ontledings oor die korttermynverhouding tussen die pryse het getoon dat sommige kleinhandelaars vinniger op ’n karkasprysstyging reageer terwyl ander weer vinniger op ’n prysdaling reageer,” sê Maré.

Al is die marge nie op kort termyn altyd konstant nie, balanseer dit op lang termyn weer uit, is in die studie bevind.

–

‘Kleinhandelaars wissel eerder die pryse van goedkoper snitte as van duurder snitte.’