Studente gewaarsku ná dosent se skorsing
DIE Departement van Landbou, Bosbou en Visserye het verlede week geweier om enige vrae te beantwoord oor die skorsing van dr. Johan van Rooyen, senior lektor en staatsveearts by die landbou-ontwikkelingsinstituut Grootfontein.
Landbouweekblad het verlede week berig Van Rooyen is op 22 Julie beveel om die kollege te verlaat en ’n skorsingsbrief van die Departement Landbou, Bosbou en Visserye is op hom beteken. Daar word verneem
Landbouweekblad dat dié skorsing nie dissiplinêr is nie, maar weens redes van “ordelike administrasie”. Volgens wet moet die werknemer regdeur die proses ingelig word oor stappe teen hom, maar Van Rooyen het ná twee maande nog niks gehoor nie. Ná Landbouweekblad se navrae aan Grootfontein is ’n SMS op 1 September aan alle studente gestuur.
“Julle word gewaarsku dat enige student wat verklarings aan die media maak, aangekla kan word van die oortreding van seksie 4.5 van die dissiplinêre beleid vir studente. Tugstappe sal gedoen word teen enige student wat skuldig bevind word aan sulke wangedrag (dit sluit skorsing in). H.L. Mukwevho, Hoof.”
VRYHEID VAN SPRAAK
Mnr. Leslie Mukwevho het by navraag gesê: “(Die studente) word nie vryheid van spraak ontsê nie en dit keer niemand om te praat nie – ons kan dit nie doen nie. Hulle moet egter daarvan bewus wees dat tugstappe teen hulle gedoen kan word as hulle teen die beleide van die instituut gaan.”
Nóg mnr. Sipho Ntombela, die departement se adjunk-direkteurgeneraal van korporatiewe dienste, wat die skorsingsbrief onderteken het, nóg me. Mmapitso Mashele, direkteur van werknemerverhoudinge, wou kommentaar lewer.
Mnr. Tino Herselman, Grootfontein se direkteur, het aan mnr. Doug Stern, Agri Oos-Kaap se voorsitter, gesê die departement het onderneem om alle prosedures wat met die skorsing verband hou, binne 60 dae, of teen 22 September, af te handel.
“Grootfontein het dr. Van Rooyen nodig in sy onderrigpos aangesien sy afwesigheid die studente benadeel, asook die plaasgemeenskap, wat sukkel sonder sy veeartsenykundige kennis. Agri Oos-Kaap sal die situasie noukeurig dophou,” sê Stern.
–