Gifhouer-oudit kan jou duur te staan kom
BOERE wat nalaat om leë plaagdoderhouers drie keer uit te spoel en op te sny, kan swaar strawwe verwag en selfs hul uitvoerstatus of plaaslike markaandeel verloor indien owerhede dit uitvind.
Sertifiseringsliggame en die Regering se ouditeure besoek tans plase waar leë plastiek-plaagdoderhouers gebruik, opgeberg en verwerk word.
Dit volg nadat verskeie plastiekverwerkers by die Plant-
beskermings- en Dieregesondheidsvereniging (Avcasa) gaan kla het omdat houers nie ordentlik gespoel word nie. Die organisasie maan dat houers wat nie reg op die plaas gehanteer word nie, nie vir herwinning verwyder sal word nie.
“Goedgekeurde plastiekverwerkers word nie verplig om ’n diens aan boere te lewer as hulle nie leë houers drie keer uitspoel nie,” sê die organisasie in ’n verklaring. “Sulke houers bly die boere se aanspreeklikheid en sal nie versamel of ontvang word vir herwinning nie. Hulle mag ook nie met normale padvervoer vervoer word nie, maar slegs deur gesertifiseerde
vervoermaatskappye.”
Mnr. Tom Mabesa, uitvoerende direkteur van Avcasa, sê uitvoerboere doen gewoonlik hul bes om die wet te volg, maar hulle moet steeds aan ouditeure bewys dat hulle dinge reg doen.
“Plase – veral in die uitvoerbedryf – regoor die land word besoek as deel van die ouditproses. Daar is nie ’n direkte finansiële implikasie nie, maar jy kan jou mark verloor.”
MAAK SÓ
Kragtens die Wet op Nasionale Omgewingsbestuur: Afval (Wet no. 59 van 2008), asook internasionale riglyne vir verantwoordelike boerdery, moet leë houers
drie keer opeenvolgende met ’n kwart van die houervolume vars water gespoel word. Die spoelwater moet in ’n spuittenk oorgegiet word. Na dit uitgespoel is, moet die houer in kwarte gesny word of vol gate gekap word. Dit moet droog wees voor dit herwin kan word. “Die leë houers mag nie hergebruik, weggedoen of verkoop word om enige ander produk in te hou nie.”
Die houers mag ook net opgeberg word op ’n terrein met ’n lisensie vir die opberging van gevaarlike afval. Dit word egter nie meer as gevaarlike afval beskou as dit drie keer gespoel, opgesny en droog is nie.
–