Môre se kommersiële boere verdien beskerming
Die bedryf vir landbouversekering moet ook vir kleinboere voorsiening begin maak, “want vandag se kleinboer is môre se kommersiële boer”. Dit was mnr. Phillip du Preez, landbouhoof van die versekeringsmaatskappy Mutual & Federal, se boodskap by ’n onlangse konferensie oor die stand van die landbouversekeringsbedryf.
Du Preez het gesê die mark vir bateversekering in die landbou is goed ontwikkel en kommersiële boere het maklik toegang daartoe. Vir kleinboere is toegang egter moeilik en bestaande produkte is nie vir hulle pasgemaak nie.
Volgens Du Preez gaan produkontwikkeling in die toekoms sukses bepaal. Die getal kommersiële boere is sedert 1994 meer as die helfte minder, maar daar kan soveel as 200 000 kleinboere wees. “Is ons gerat hiervoor? Het ons die produkte? Ek twyfel.” Prof. Andries Jordaan, direkteur van die Afrika-sentrum vir rampbestuur en -opleiding aan die Universiteit van die Vrystaat, sê kleinboere is strategies belangrik omdat hulle hul gesinne onderhou, maar die Regering se verantwoordelikheid word as hulle ophou boer.
’n Eksterne skok, soos ’n droogte, lei gewoonlik tot die uitwissing van sulke boere se produksiebates, en arm boere is buite verhouding weerloos teen sulke skokke. Hy sê sulke boere is trouens nie eens bestand teen normale droë jare nie. Volgens die sentrum se ervaring is daar elke drie jaar ’n droogte.
Die sentrum het aanduiders ontwikkel waarvolgens verskillende fases van ’n droogte geklassifiseer kan word. Daarvolgens behoort die Regering se veiligheidsnet vir bestaans- en kommunale boere in werking te tree wanneer die tipe droogte wat byvoorbeeld een keer in tien jaar voorkom, geïdentifiseer word.