GROEIMIDDELS IN VLEIS: STRENGER WETTE GEVRA

Suid-Afrikaanse wetgewing behoort strenger te wees oor die residue van middels wat groei bevorder wat in vleis teenwoordig mag wees.

Prof. Eddie Webb, waarnemende adjunk-dekaan van die fakulteit natuur- en landbouwetenskappe aan die Universiteit van Pretoria, sê die toegelate maksimum residuperk behoort terselfdertyd ook beter gemonitor te word.

Eddie was een van die sprekers op ’n werksessie wat die Devon-slagplaas saam met die Rooivleis-abattoirvereniging in Kempton Park aangebied het.

Hy beskou die huidige wetlike perke as te hoog vir party groeiregulerende molekules, terwyl daar middels is waarvoor geen spesifieke vlakke aangedui word nie.

In ander lande het residue in voedselprodukte al tot groot hofsake gelei. Eddie sê verbruikers gaan na verwagting toenemend bewus word van veiligheidskwessies rondom vleis en ook ál meer druk daaroor uitoefen. Verbruikers verwag egter ook ál meer dat omgewingsvriendelik geboer moet word.

Daarvoor is die gebruik van middels om groei te bevorder tans nog noodsaaklik omdat min uitgebreide weiding beskikbaar is en produksie vir die toenemende vraag na rooivleis verhoog moet word. Navorsing kon nog nie ander of beter metodes oplewer om produksie te verhoog nie.

Alternatiewe metodes vir die bevordering van groei, soos passiewe immunisering teen groeibeperkende faktore, toon groot potensiaal vir die toekoms, maar Eddie sê hoewel navorsing daaroor met proefkonyne goeie resultate toon, is dit nog nie prakties toepaslik by herkouers nie. Hy sê dit is intussen belangrik dat daar ’n groter bewustheid oor residuvlakke en -monitering in die rooivleisbedryf moet wees. Die Departement van Landbou weet bestaande wetgewing moet hersien en verander word en Eddie sê dit is belangrik dat die bedryf en die staat gesprek daaroor voer. “’n Behoorlike studie moet byvoorbeeld gedoen word om te bepaal hoeveel monsters vir behoorlike residumonitering nodig is.” — CARIEN KRUGER