Reis saam na EuroTier in Duitsland Landbouweekblad se lesers het die kans om die grootste handelskou vir die veebedryf in November in Duitsland by te woon.
Kry jou paspoort gereed en reis vanjaar saam met Landbouweekblad en die Duitse Handelskamer in Suid-Afrika na EuroTier in Hannover, Duitsland.
EuroTier is die wêreld se grootste handelskou vir die veebedryf. Dit word van 15 tot 18 November deur die Duitse Landbougenootskap (DLG) aangebied. Die skou word elke tweede jaar aangebied. Dit word afgewissel met die landboumasjinerieskou AgriTechnica.
EuroTier het in 2014 ongeveer 156 500 besoekers gelok, waarvan sowat 35% van buite Duitsland gekom het. Alle uitstallers is bedrewe in Engels om maklik met hul internasionale gehoor te kommunikeer. Sowat 2 500 uit- stallers van 50 lande neem deel.
Bykans elke moontlike vertakking in die veebedryf kry aandag – van veemedisyne en tegnologie vir hoëproduksie-eenhede tot sekondêre bedrywe, soos alternatiewe energie uit biogas. Grootvee, kleinvee, pluimvee, varke en selfs hase en akwakultuur het ’n plek op dié skou. Bekende toerusting, soos voermengers, melkmasjiene en veeskale, tot vernuwende, nuwe hulpmiddels vir die veeboer is hier te sien. Dit sluit in veebestuursprogramme, toerusting en tegnologie vir presisieboerdery en adviesdienste.
Kyk uit vir die innovasietoekennings, die hoogste eer wat dié skou aan uitstallers van nuwe produkte en dienste gee. Die skou is die ideale geleentheid om nuwe idees vir jou boerdery- of landbou-onderneming in te win. EuroTier se Internasionale Paviljoen is ’n ontmoetingsplek vir sakelui en boere van oor die hele wêreld. Dit is ’n goeie plek om transaksies te beklink.
TOER SAAM
Die reisgeselskap vertrek op 12 November uit Johannesburg en keer op 20 November terug na die internasionale lughawe O.R. Tambo.
Die toerkoste sluit in vliegkaartjies, binnelandse reise, verblyf en ontbyt by viersterverblyf, besoeke aan plase en toepaslike instellings, en toegang tot EuroTier. Die Handelskamer sal jou bystaan met reisreëlings en jou visumaansoek.
Uitstappies sluit in ’n draai by ’n bulteelstasie en veterinêre navorsingsplaas, en ook ’n besoek aan ’n maatskappy wat hom toespits op tegnologie wat verband hou met genomiese toetsing, teling en naspeurbaarheid. Op 16 en 17 November woon die groep EuroTier by. Die stad Bremen gaan ook verken word, sowel as Autostadt in Wolfsburg, die tuiste van Volkswagen.
Verteenwoordigers van die Duitse Handelskamer in Suid-Afrika en Liza Bohlmann van Landbouweekblad vergesel die toergroep. Dit is ’n beperkte aanbod, want slegs 12 sitplekke is beskikbaar.