Verstaan Chinese landskap vóór jy waag
China lewer 30% van alle vrugte en 50% van alle groente ter wêreld. Neem dus kennis van dié mark.
China bied baie geleenthede, maar leer ken eers die mark en moenie dadelik sukses verwag nie. Dít was die boodskap van twee sprekers op die Produce Marketing Association (PMA) se Fresh Connections-konferensie in Pretoria. Mnr. Jason Bosch van die maatskappy Origin Direct Asia en me. Cecilia Landman van The X-Group, doen reeds geruime tyd sake in China.
Nóg ’n boodskap is dat die Chinese mark wel groot is, maar nie onversadigbaar nie.
“Hou in gedagte dat China self groot hoeveelhede groente en vrugte lewer. Lande soos Thailand, Chili en Viëtnam wat goed ingerig is vir uitvoer na China, is groot mededingers vir lande soos Suid-Afrika en Australië. Ons moet nuwe bande smee en Chinese kopers met Suid-Afrikaanse verskaffers verbind,” het mnr. Richard Owen van die PMA gesê.
Jason het voorheen sewe jaar lank in China gewoon en gewerk. “Die uitdaging is om nuwe geleenthede in die Chinese mark te ontgin. Dit is ’n land wat baie van ons s’n verskil. Diegene wat wil handel dryf, moet die verskille verstaan tussen China en Suid-Afrika, maar ook tussen die verskillende streke en stede in daardie land,” het Jason gesê.
Statistieke van die Verenigde Nasies se Voedel- en Landbouorganisasie dui aan die wêreldwye handel in vrugte en groente het van 2004 tot 2013 met gemiddeld 4% per jaar toegeneem. China se invoer het bogemiddeld met 5% toegeneem, terwyl die Europese invoer van groente en vrugte met 8% gedaal het. Van die produkte wat uitstekende groei in gewildheid toon, is kersies, avokado’s, appels, pomelo’s en pruime.
“E-handel in China is baie gewild en ons sien reeds dat verbruikers én handelaars ook in die varsproduktemark elektroniese handel gebruik,” sê Jason.
Hy het ’n waarskuwing vir nuwe toetreders wat dalk dink China is ’n maklike uitvoerland: “China lewer reeds 30% van alle vrugte en 50% van alle groente ter wêreld. As daar ’n ooraanbod is, verloor produkte hul aansien. Voorts is ’n groot veldtog begin teen enige korrupsie en invoerders is lugtig om nuwe transaksies aan te gaan.
“Een van ons struikelblokke is die gebrek aan gunstige handelsooreenkomste tussen Suid-Afrika en China. Invoerbelasting gaan ons binne minder as drie jaar uit die mark dwing as ons nie daaraan aandag gee nie.”
Cecilia se ervaring in die Chinese mark het haar gou geleer van die verskillende streke se voorkeure en ook hoe belangrik simbole in die Verre-Ooste is.
“Dit is ’n groot, gegoede mark wat ’n lus het vir luukse produkte. Chinese heg groot waarde aan gehalte en sien dit as ’n statussimbool om sekere vrugte op die tafel te hê. Jy moet jou mark leer ken en verstaan watter eienskappe en selfs kleure, syfers en simbole op die verpakking belangrik is,” sê Cecilia.
Sy vertel hoe die groot “X” in The X-Group se handelsmerk onwetend vir hulle ’n remskoen was.
“Ons kon nie verstaan hoekom ons topgehalte produkte nie in die Chinese mark presteer in nie. By nadere ondersoek en deur met kopers te gesels kom ons toe agter die X beteken in Chinees niks anders as ‘afgekeur’ nie. Nadat ons die verpakking verander het, presteer ons baie goed!”