AKWAKULTUUR: KABELJOU VOU, PERLEMOEN BLOM

DIE akwakultuurbedryf is tans gewikkel in ’n situasie van uiterstes. Perlemoenboere glimlag weens ’n gunstige wisselkoers en uitstekende produkte, terwyl kabeljouboere veg om oorlewing.

Volgens mnr. Neil Stallard, ’n kabeljouboer van die visplaas Mtunzini aan die KwaZulu-Natalse Noordkus, was die afgelope 12 maande ’n moeilike tyd vir kabeljouboere. “Daar is ’n verskil tussen wat kabeljouboerdery kan produseer en wat beleggers verwag. Beleggers verwag goeie resultate binne twee jaar, terwyl dit moeilik is om in ’n boerdery daaraan te voldoen,” sê Stallard.

Volgens mnr. Etienne Hinrichsen, besturende direkteur van AquaEco, is die produksiekoste van kabeljou teenoor die verdienste daarvan baie hoog. “Om hierdie syfers te laat klop, moet die insetkoste verlaag word en dit verg die verhandeling van groot volumes vis. Dit is dus kommerwekkend om te sien hoe ywerig sommige partye hierdie bedryf aanhou ondersteun sonder die nodige markontwikkeling,” verduidelik Hinrichsen.

Die perlemoenbedryf beleef egter ’n baie goeie jaar. Die eerste resultate van see-boerderye, waar boere met perlemoen in die see boer en 24 uur sekuriteitsdienste aanstel om die persele op te pas, lyk ook goed. Die uitstekende gehalte van Suid-Afrikaanse perlemoen speel ’n groot rol om mededinging van Chinese en ander produsente die hoof te bied, maar die risiko is steeds daar.