DOENMEEROMGRAS TE BEWAAR
Jaar ná jaar in die laat winter sien ’n mens rooi wolke en galoppende vlamme wat deur sterk wind aangedryf word. Dit is ’n verlore styd om die vlamme te blus. Dit veroorsaak groot skade aan weiveld, ’n verlies aan vee en skade aan geboue. Daar is selfs soms ’n verlies aan menselewens. Versekeringsmaatskappye word met groot eise gekonfronteer en premies styg.
Blote voorbrande blyk onvoldoende te wees.
Groot bedrae kapitaal word tereg aan die opgaar van water in damme en graan in silo’s bestee. Waarom nie dieselfede sorg toepas ten op sigte van gras nie? Dit is tog net so noodsaaklik.
Ja, natuurlik is dit veel goedkoper om gras maar net deur vee te laat bewei. Maar wanneer die dag aanbreek dat daar geen gras meer is nie weens veldbrande of droogtes en die vee op die plaaswerf hartverskeurend vir kos blêr of bulk, moet die boer sy hand baie diep in sy sak steek. Dan moet hy desnoods op sy knieë voor die bankbestuurder gaan val.
Kan die gras (die brandstof van die vlamme) nie geoes en in skure of voerbanke geberg word vir die tye wanneer dit so lewensnoodsaaklik is om byvoorbeeld droogtes en die moeilike vroeë lente te temper nie? En boonop verlaagde versekeringspremies as bonus te kry?
Hoewel die afsny en opberging van gras nie ’n waarborg is vir die uitskakeling van veldbrande nie, kan dit brande tot die minimum beperk en die bestryding daarvan soveel makliker maak.
Die voordeel van so ’n onderneming is so voor die hand liggend dat dit my verbaas dat dit nie reeds op groot skaal beoefen word nie. Die veldbrande met pynlike gevolge duur jaar ná jaar voort.
Brandvoorkoming is tog baie makliker as brandbestryding. Boonop het dit ’n bate pleks van ’n verlies tot gevolg.
Wat Suid-Afrika nodig het, is ’n paar farao’s met nagmerries en ’n paar Josefs met insig in die nagmerrie plus die vermoë om landwyd ’n onderneming tot stand te bring om in volop tye gras te “bank” vir die maer tye.
Dink net hoeveel rustiger gaan ’n boer slaap as hy gras in die “bank” en uiteindelik selfs geld in die bank het. GERT KRUGER