BRUCELLOSE-STRYD BRING HOOP
’N LANDWYE projek van die Nasionale Dieregesondheidsforum teen die groeiende bedreiging van brucellose kan rigtinggewend wees in hoe Suid-Afrika sy kuddegesondheid – en dus die gehalte van sy rooivleis – kan beskerm en verbeter. Met dié projek wil die forum samewerking tussen boere, staats- en private veeartse bemiddel.
Dr. Pieter Vervoort, voorsitter van die forum, sê die veldtog is geskoei op ’n bloudruk wat die bedryf en die Departement van Landbou, Bosbou en Visserye saam met die internasionale organisasie vir dieregesondheid (OIE) opgestel het en sal in die toekoms vir ander siektes ook aangewend word.
“’n Belangrike saak wat in die OIE se verslag uitgestippel is, is die noodsaaklikheid van beter samewerking tussen die staat en die openbare sektor,” sê Vervoort. “Dit is nie meer aanvaarbaar dat die staat vir die boere sê wat om te doen nie. Die breë diereproduksiesektor bestaande uit organisasies en boere moet deel van die oplossing word, anders sal daar geen vordering wees nie.”
KENMERKE
Vervoort sê brucellose het etlike kenmerke wat dit ideaal maak om ’n breër siektebestrydingsmodel te ontwerp. Die bestryding daarvan vereis ’n goeie identifikasiestelsel vir diere, sowel as ’n stelsel om die beweging van diere te moniteer. Omdat die siekte van dier na mens oorgedra kan word, is die bestryding daarvan meer as een beroep se verantwoordelikheid. Goeie laboratoriums is ook noodsaaklik.
–