SLEUTELDOSENT SE SKORSING SLEEP VOORT
’N STAATSVEEARTS en senior dosent aan die Landboukollege Grootfontein kon nog net een dag by die werk deurbring sedert hy op 22 Julie geskors is.
Dr. Johan van Rooyen is aanvanklik vir 60 dae geskors tot 18 September, na bewering omdat hy lede van die unie vir staatsamptenare (PSA) aangeraai het om nie hul samewerking te gee in ’n ondersoek na kuddebestuur op die navorsingsplaas nie.
Sy kantoorsleutels is gekonfiskeer en hy is die perseel belet. Hy het op 19 September kom werk, maar die volgende dag is hy toegang tot sy kantoor geweier en sy kantoorsleutels is wéér afgevat.
Sy dissiplinêre verhoor was geskeduleer vir 3 en 4 Oktober, maar op 30 September het die Departement van Landbou, Bosbou en Visserye dit uitgestel tot 26 en 27 Oktober omdat ’n getuie nie die aanvanklike verhoor kon bywoon nie.
Die PSAvakbond, waarvan hy Grootfontein se takvoorsitter is, het sedertdien ’n dispuut by die staatsdiensbedingingsraad – die staatsdiens se ekwivalent van die Kommissie vir Versoening, Bemiddeling en Arbitrasie – verklaar weens onwettige en onbillike skorsing. Dit word op 15 November by Grootfontein aangehoor.
AFWESIG
Intussen kan Van Rooyen geen van sy pligte as dosent en staatsveearts nakom nie. Hy doseer nege vakke per semester, insluitend sleutelvakke, soos die reteelt en genetika. Hy gebruik tans medikasie vir die spanning wat die skorsing veroorsaak.
Die departementele ondersoek na die kuddebestuur is skynbaar geloods ná bewerings deur die Grootfonteintak oor korrupsie en die aanhou van diere in private besit op die kollege se plaas.
Die persone wat vir die troppe en kuddes by Grootfontein verantwoordelik is, is almal lede van die PSA.
Toe ’n taakspan van die departement op 19 Julie by die kollege opdaag om die bewerings te ondersoek, het Van Rooyen in ’n epos PSAlede afgeraai om saam te werk omdat die PSA geen inligting of besonderhede oor die ondersoek ontvang het nie.
Nehawu se Grootfonteintak is glo ingelig.
Nadat hy die voorwaardes van die ondersoek ontvang het, het Van Rooyen PSAlede toe per SMS aangeraai om wel saam te werk. Drie dae later is hy geskors. –
‘Hy het op 19 September kom werk, maar die volgende dag is hy toegang tot sy kantoor geweier en sy kantoorsleutels is wéér afgevat.’