SPEENKALWERS | Hoop dat uitvoer gou herstel
Daar is skynbaar lig aan die einde tonnel wat die uitvoer van speenkalwers na Suid-Afrikaanse voerkrale betref, het mnr. Mecki Schneider, uittredende voorsitter van die Namibiese lewendehaweprodusenteorganisasie (LPO), aan gesê.
’n Aantal Suid-Afrikaanse voerkrale is geakkrediteer om uitvoer vanaf Namibië te ontvang en nóg voerkrale is in die proses om geakkrediteer te word. Die onus is op daardie slagplase om naspeurbaarheid te handhaaf. Die speenkalwers moet direk vanaf Namibië na die voerkraal gaan, hul verskuiwing van een kraal na ’n ander moet bewys kan word en daar moet rekord gehou word van elke dier wat na ’n slagplaas geneem word.
Daar is skynbaar nog vertragings omdat die Suid-Afrikaanse owerhede Namibiese aansoeke terugstuur vir korreksies.
Speenkalf-uitvoer na Suid-Afrika het tot stilstand gekom ná die land, ingevolge voorskrifte van die internasionale dieregesondheidsorganisasie (OIE), op 1 Julie nuwe regulasies oor die invoer van lewende hawe ingestel het. Dit het groot ontevredenheid veroorsaak onder Namibiese boere wat grootliks van speenkalf-uitvoer na Suid-Afrikaanse voerkrale en slagplase afhanklik is.
Die LPO sê in sy jaarverslag die instel van hierdie streng maatreëls het min met Namibië se gesondheidsmaatreëls te doen en is eerder ’n handelsbeperking om hoër produsentepryse in Suid-Afrika te skep deur die vraag te verhoog.
Die LPO sê die Suid-Afrikaanse owerhede het geen dringendheid getoon om ’n oplossing te vind nie – nie eens om ’n onderskeid te tref tussen teeldiere en vee wat vir slagplase en voerkrale bestem is nie.