NUWE MARKTE | Namibië toets VSA en die Verre-Ooste

Besendings Namibiese rooivleis is na Hongkong en Amerika gestuur om die mark daar te toets. Dit kan verligting bring vir die land se beleërde veeprodusente wat onder droogtes en uitvoerbeperkings na Suid-Afrika gebuk gaan.

Volgens dr. Frank Chitate, Namibië se direkteur van dieregesondheid, is gesondheidsertifikate pas gefinaliseer en ’n skeepshouer met ontbeende beesvleis is na Amerika versend. Nog ’n skeepshouer met been-in-vleis is na Hongkong versend. Hulle wag nog vir dié lande se reaksies.

Mnr. Goliath Tujendapi, bestuurder vir handel en bemarking van die Vleisraad van Namibië, het gesê die Namibiese vee- en rooivleisbedryf moet seker maak hy kan sy uitvoer na verskillende lande handhaaf. Boere moet indringerbosse in weiveld uitroei om die veld se drakrag en dus produksie te verhoog. Boere moet ook aandag gee aan voedselveiligheid en die nodige standaarde, wat andersins handel met die buiteland aan bande kan lê.

Hy het gesê Namibië voer reeds vleissnitte uit na onder meer die Mercosur-lande (Argentinië, Brasilië, Uruguay en Paraguay) en die Europese Unie (EU). Uitvoerders toets tans die markte in China en Hongkong.

Die Namibiese rooivleisbedryf is uitvoergedrewe, en voer in ’n goeie jaar 85% van sy vleis uit. Daarvan word 171 000 speenkalwers, 115 000 osse, 15 000 tot 17 000 ton beesvleis, 90 000 skape, 270 000 bokke en 850 000 lamkarkasse normaalweg na Suid-Afrika uitgevoer. Sowat 9 500 ton beesvleis word na die EU (Brittanje, Noorweë, Duitsland, Switserland en Nederland) uitgevoer.