GEEN SKOUERSTUKKE, VRA VARKBOERE
VRESE dat die blou-oorsiekte by varke (PRRS) die land kan binnekom, sit agter die Suid-Afrikaanse Varkvleisprodusente-organisasie (Savpo) se hofaansoek om die invoer van varkskouerstukke uit Amerika te verbied.
Savpo het dié aansoek onlangs by die Noord-Gautengse Hooggeregshof ingedien. Die Departement van Landbou, Bosbou en Visserye het reeds aangedui hy gaan die aansoek teenstaan.
’n Ooreenkoms om varkskouerstukke in te voer is gesluit as deel van onderhandelinge vir tariefvergunnings onder die Amerikaanse wet op groei en geleenthede in Afrika (Agoa).
Mnr. Simon Streicher, uitvoerende hoof van Savpo, het aan Landbouweekblad gesê die ooreenkoms – tussen die Amerikaanse departement van landbou (USDA) en die Departement van Landbou, Bosbou en Visserye – handel net oor varkskouerstukke wat limfkliere en -knope bevat. Dit is in dié snitte waarin PRRS kan voorkom.
INVOERPROTOKOL
Streicher het gesê ander snitte, wat nie ’n risiko inhou nie, kan steeds ingevoer word.
“Varkskouersnitte word ook uit ander lande ingevoer, maar die invoer mag net na goedgekeurde verwerkingsaanlegte gaan. Die aanlegte word gereeld deur die Veeartsenydiens geïnspekteer om te verseker dat alle afvalstukkies op ’n goedgekeurde wyse ingevolge die VPN42 (veeartsenykundige prosedurele nota) – die Veeartsenydiens se invoerprotokol – vernietig word. Amerika moet soos alle ander uitvoerlande behandel word en die VPN nakom.”
Savpo het reeds die hofstukke ingedien. Nou moet die staatsprokureur ’n beantwoordende verklaring indien, waarna die saak op die hofrol geplaas sal word. Streicher sê hulle het vir ’n vroeë verhoordatum gevra.
PRRS is endemies in Amerika en snitte wat limfkliere of -knope bevat, hou risiko’s in.
Ander varksnitte mag wel ingevoer word. ’n Lys van snitte wat wel ingevoer mag word, is beskikbaar.
“As Amerika wel sulke lae-risiko-snitte wil uitvoer, kan dit volgens die VPN gedoen word. Dit is op alle varkvleisuitvoerders van toepassing,” sê Streicher.
REKENSKAP
Die VPN bepaal dat lande waar PRRS teenwoordig is, wel sekere goedgekeurde snitte regstreeks na enige verwerker mag uitvoer. Sulke snitte word in die invoerpermit beskryf.
“Snitte wat volgens die Veeartsenydiens moontlik PRRS kan oordra, moet óf in die uitvoerland voor uitvoer verwerk word óf as onverwerkte varkvleis uitgevoer word. Dít mag net onder veeartsenytoesig in Suid-Afrika na ’n veeartseny-goedgekeurde verwerkingsaanleg vir verwerking gaan.
“Die aanlegte word deur die Veeartsenydiens geouditeer en rekenskap moet van alle vleis gegee word. Net enkele lande waar PRRS nie voorkom nie mag sonder enige beperking na Suid-Afrika uitvoer.”
Streicher sê nog net 500 kg varkvleis is vanjaar uit Amerika ingevoer. “Suid-Afrika voer jaarliks tussen 30 000 ton en 35 000 ton varkvleis in. Alle uitvoerlande, behalwe Amerika, het die VPN42-bepalings aanvaar,” sê hy.