YANKS HOOP BEESLEWERS IS NET DIE BEGIN
LEWER is die beesproduk waarvan Amerika tans die meeste na Suid-Afrika uitvoer sedert hy weer toegang tot die mark gekry het. Die Amerikaanse vleisbedryf is ook gretig om markte dwarsoor Afrika uit te brei, sê verteenwoordigers van dié land se vleisbedryf.
Amerikaanse bees-, vark- en hoendervleis kan tegnies gesproke sedert begin vanjaar weer na Suid-Afrika uitgevoer word nadat die oopstel van die markte ’n voorwaarde was vir Suid-Afrika om deel te kon bly van die Amerikaanse wet op groei en geleenthede in Afrika (Agoa).
Amerika het jare gelede die markte weens onder meer teenstortingstariewe en dieresiektes verloor. Amerikaanse uitvoerders ervaar egter nou ongunstige opvattings oor hul produkte in Suid-Afrika. As deel van ’n inligtingsprogram het uitvoerders Suid-Afrikaanse joernaliste na Amerika gebring.
Mnr. Dan Halstrom, senior ondervoorsitter vir bemarking van die Amerikaanse vleisuitvoerfederasie (USMEF), het by die organisasie se hoofkantoor in Denver, Colorado, aan die groep gesê Amerika se uitvoer van beeslewers na Suid-Afrika werk vir albei partye.
“Dit is die soort verhouding wat ons wil kweek. Ons wil nie plaaslike produksie vervang waar dit werk nie.”
Benewens beeslewers kyk uitvoerders ook na geleenthede vir ander produkte, soos beesharte en -niere.
Die USMEF het benewens sy hoofkantoor in Denver ook 18 kantore in ander dele van die wêreld van waar hy markte ontwikkel. Die land het verlede jaar altesame sowat 1,1 miljoen ton bees- en 1,1 miljoen ton varkvleis uitgevoer, met Japan en Mexiko wat sy grootste markte is.
Hy werk ook hard aan marktoegang in China. Sentraal-Amerika is persentgewys sy vinnigste groeiende markstreek. Die USMEF se jongste kantoor in Lima, Peru, het in 2011 geopen en uitvoer daarheen het goed gegroei.
AFRIKA
“Ek kan my voorstel dat Afrika op dieselfde manier kan groei, maar dit is nóg ’n nuwe streek vir ons. Afrika is in die algemeen beslis op ons radar.”
Halstrom het gesê Suid-Afrika was nie voorheen vir Amerika ’n groot beesvleismark nie, maar alle markte is belangrik. ’n Aanvanklik klein mark kan 20 jaar later ’n groot mark wees.
Hy verwag dit gaan ’n tyd lank duur vir Amerika om weer ’n mark in Suid-Afrika op te bou.
“Amerika was so lank uit die mark mense in Suid-Afrika nie die land se bees- en varkvleis en die eienskappe daarvan ken nie.’
Die USMEF gee baie aandag daaraan om op die markte waar hy toegang het verbruikers oor sy produk in te lig. Die organisasie het in Augustus ’n seminaar in Johannesburg aangebied waar 11 Amerikaanse uitvoerondernemings sowat 30 potensiële kliënte ontmoet het, meestal van Suid-Afrika maar ook ’n paar van Nigerië. –
‘Ons wil nie plaaslike produksie vervang waar dit werk nie.’