OOPGROEFMYN KWEL KZN-BOERE

’N GROEP boere in die noorde van KwaZulu-Natal maak hulle reg om hof toe te gaan oor ’n mynmaatskappy wat uit die bloute ’n ou oopgroef-steenkoolmyn weer in gebruik gestel het.

Mnr. Johann Boonzaaier, uitvoerende hoof van die Impalawatergebruikersvereniging van Pongola, sê boere is onseker of die mynbedrywighede wettig is.

“Die boere van die Paulpietersburg-omgewing het die bedrywighede op die plaas Zoetmelksrivier gewaar en kapsie gemaak.

“Die mynmaatskappy, Hoshoza Resources, het ’n vergadering met al die boere van die omgewing in die Khumbula-boerevereniging se saal aangevra.”

Boonzaaier sê mnr. Ken Smith, Hoshoza se woordvoerder, kon op die vergadering van 28 September telkemale nie boere se vrae beantwoord nie, en hulle was nie tevrede met die inligting wat hy voorgelê het nie.

Die boere het ’n mosie aanvaar dat Hoshoza moet bewys dat hy die nodige myn- en waterlisensies het, dat hy voldoen aan die nodige omgewingsimpakvereistes, en dat hy met boere in die omgewing gekonsulteer het.

“Nie een van die boere kan onthou dat daar met hulle oor hierdie myn gekonsulteer is nie,” sê hy.

KOMMERWEKKEND

Boonzaaier weet van 19 uitgediende myne in die opvangsgebied van die Bivanedam (die Impala-waterskema se bron) waar verskillende maatskappye vir hoofsaaklik steenkool wil myn. Meeste van dié aansoeke is in die hoëreënvalgebied in die weste.

“Indien hierdie waterbron nie baie goed opgepas word nie, sal die boere wat van die skema afhanklik is, baie vinnig baie swaar kry. Ons het dus hierdie saak aan ons prokureurs oorhandig met die instruksie dat hulle die betrokke regulasies, wat ons in staat sal stel om ’n interdik teen die myn te kry, moet ondersoek.

“Indien die myn se lisensies alles gereed en korrek is, is dit baie kommerwekkend, maar alle aanduidings toon dat hierdie myn onwettig is,” sê Boonzaaier.

Teen begin Oktober, volgens Boonzaaier, was daar reeds ’n doeltreffende padnetwerk op die perseel aangebring en opgrawings en grondverskuiwing met splinternuwe werktuie het reeds begin.

Volgens ooggetuies is ’n vraghouer-kantoor en groot dieseltenk, glo sonder die wetlik verpligte stortingsbeskerming, op die perseel opgerig.

Nóg Mnr. Ken Smith van Hoshoza nóg die Departement van Energie kon vir kommentaar bereik word.

–

‘Nie een van die boere kan onthou dat daar met hulle oor hierdie myn gekonsulteer is nie.’