BAKTERIEË GENETIES GEMANIPULEER OM GRONDLEWE TE MEET
’n Mikroskopiese metode waarmee organismes se gedrag in die grond regstreeks “gelees” kan word sonder om ’n grondmonster te versteur, is deur wetenskaplikes aan die Rice-universiteit in Amerika ontwikkel.
Die Rice-navorsers meen die nuwe gasbiosensors wat hulle ontwikkel het, sal landbouwetenskaplikes in staat stel om onder meer die mikrobiese proses van stikstofbinding eerstehands in die laboratorium te bestudeer.
Die sensors bestaan uit bakterieë wat op ’n sintetiese wyse geneties gemanipuleer is om metielhaliedgasse vry te stel, waarmee die mikrobes se genetiese uitdrukking in ’n grondmonster dopgehou kan word.
Die bakterieë word geprogrammeer om gasse vry te stel sodra hulle DNS met organismes in die grond uitruil. Dít stel navorsers in staat om die werking van mikrobiese gemeenskappe in die grond regstreeks te monitor sonder dat die grond versteur hoef te word.
Die Rice-span voorsien dat hul geprogrammeerde biosensorbakterieë dieselfde doel kan dien as die fluoressensie-proteïensensors wat omgewingswetenskaplikes reeds gebruik om proteïen-uitdrukking en ander prosesse in biologiese stelsels te meet.
Die GM bakterieë se gasvrystelling verteenwoordig ’n nuwe werktuig wat wetenskaplikes nou kan gebruik om te bestudeer hoe verskillende soorte mikrobes genetiese materiaal in hul omgewing uitruil.
Hierdie soort uitruiling beheer byvoorbeeld die proses waarmee Rhizobia stikstof bind om plante te help groei.
Soortgelyke uitruiling van genetiese materiaal vind plaas wanneer bakterieë in die grond weerstand teen antibiotika oordra.
Die wetenskaplikes hoop om binnekort met die hulp van dié nuwe biosensors grondmonsters in die laboratorium te toets en daarvolgens beter aanbevelings aan boere te maak.
Dit kan mettertyd doeltreffender wateren misstofverbruik bewerkstellig. – MARLEEN SMITH