Maximacs maak naam
Met ’n vars benadering ten opsigte van bemarking en diversifikasie behaal Maximacs groot sukses in die makadamiabedryf.
Maximacs wou anders wees as ander makadamia-verwerkers in Suid-Afrika. Nou kan dié maatskappy sê hy het sy spore in die bedryf verdien. Mnr. Viljee Lombaard en sy broer, Pierre, het Maximacs (oftewel Maximizing Macadamias) tien jaar gelede begin. Hulle het die moeilike pad gekies en aan die begin regstreeks na die kleinhandelaar toe gegaan.
“Ons het ons eie prys by die kleinhandelaars beheer. Ons wou nie soos ander boere net die pryse aanvaar nie. Ons het geweet makadamias gaan nie vir altyd net in Chinese wegneemetes gebruik word nie – dit was die vinnige en maklike pad wat ander verwerkers gevolg het.” Van 2013 af het die onderneming gedy. “Ons het 300 kleinhandelspunte gehad. By al die kleinhandelaars was ons makadamia-broslekkers, sjokolade met makadamia en gegeurde makadamias ’n groot sukses.
“Die ou probleem in die kleinhandel van beperkte voorraadsekerheid het egter vinnig opgeduik. Dit was moeilik om die regte kombinasie van makadamias van die groot verwerkers te verkry.
“Met ons vinnige groei het party verwerkers ons as ’n bedreiging gesien en toe wou hulle nie meer neute aan ons verskaf nie, of hulle het die pryse verhoog. Ons moes van voor af oor ons onderneming dink,” sê Viljee.
Hoewel Maximacs steeds aan sommige kleinhandelaars verkoop, het hy drie jaar gelede ’n moderne verwerkingsfabriek gebou.
“Ons is self boere en het begin om ons eie neute te kraak. Vandag voer ons 3 000 ton uit Afrika in. Ons sakeplan behels om te diversifiseer. Maximacs wil nie hê boere moet die bedryf verlaat nie.”
Net ’n deel van Maximacs se oes gaan na sy kleinhandelskontrakte, terwyl hy steeds aan sy bestaande verwerkers verskaf. Hy wil nie in China uitbrei nie, maar eerder in Europa en Amerika. Die afgelope twee jaar het Maximacs ’n handkraker vir makadamias ontwikkel en neute in hul doppe na Europese en Amerikaanse verbruikers uitgevoer. Bydraend tot die sukses is dat makadamias in doppe al hoe bekender raak en as ’n gesondheidsneut bemark word.
“Niemand kan ons dit nadoen nie – nie eens Australië nie. Maximacs is die enigste makadamiaverwerker ter wêreld wat die bedryf op al die grootste internasionale voedselskoue op al die vastelande verteenwoordig. Só skep die maatskappy ’n groot kleinhandelsvraag.” www.maximacs.com