Landbouweekblad
’n swaar kalf moet speen.
In sy boerdery dink Joggie baie vernuwend en gebruik die jongste tegnologie. Omdat aanpasbaarheid so belangrik in die kudde is, word kondisietellings maandeliks gedoen. Dit help met seleksie en bestuur.
Die kudde se goeie genetiese neigings en hoë vrugbaarheid – die koeie se gemiddelde tussenkalfperiode (TKP) is slegs 385 dae – is ’n bewys dat Joggie se teelbeleid geslaag is.
Hy het verlede jaar 98 bulle aan stoet- en kommersiële telers verkoop. Die kudde het in ’n kort tyd baie vermag.
JOHAN STYGER Hierdie wetenskaplik georiënteerde boer wat daaraan glo om dinge reg te doen, boer naby Klerksdorp met Simmentalers.
Johan se kudde het Breedplan se vierster-gradering vir volledigheid van prestasie behaal en het ’n TKP van slegs 390 dae. Hierdie syfer sluit sy eerstekalfverse in, wat op 13½ maande gedek word. Die dektyd is slegs 42 dae vir verse en 57 dae vir koeie.
Om inteling in die kudde te beperk, gebruik hy ’n parings- program, Mating Predictor, en ’n sagtewareprogram, Matesel, wat die hele kudde se gewenste genetiese vordering simuleer. Hy beskou die selfvervangingvoerkraalindeks as ’n onontbeerlike hulpmiddel in sy seleksieprogram, maar plaas ook ekstra seleksiedruk op vrugbaarheid en geboortegemak. Poenskoppe met genoeg pigment wat struktureel korrek en glad van haar is, kry voorkeur.
Uit dié uitstekende kudde is verlede jaar 15 bulle aan kopers regoor die land verkoop.
Johan is ’n leier in die bedryf wat glo aan samewerking met wetenskaplikes van oor die hele wêreld. Dit laat hom toe om op ’n internasionale vlak te kan meeding. Trouens, sy toepassing van teeldoelwitte en gevolglike genetiese neigings plaas hom aan die voorpunt van genetiese verbetering in die land en laat hom toe om internasionaal mee te ding. Johan gee terug aan die bedryf deur dikwels kursusse in praktiese teling aan te bied.
CHRISTOPHER SPARKS Hierdie leier in die teelbedryf met sy uitgebreide sakebelange se jong Branguskudde bestaan sedert 2000 en het reeds baie vermag met sy stoetery.
Christopher se lae TKP van ongeveer 390 dae in die afgelope vyf jaar is ’n duidelike bewys daarvan.
Hoewel diere blootgestel word aan uiterste klimaatstoestande – die plaas by Montrose in die Vrystaat is 1 720 meter bo seevlak – word hulle grootgemaak met slegs ’n goeie lek. Jong bulle word aan veldbultoetse onderwerp voordat hulle gebruik of verkoop word.
Hoewel vrugbaarheid die belangrikste seleksiekriteria in die koeikudde is, lê Christopher ook groot klem op vleisgehalte in sy teelbeleid.
Die verskillende eerbewyse wat die stoetery in die afgelope jare ontvang het, is ’n bewys van die kudde se uitnemendheid. Altesaam 21 bulle is verlede jaar aan stoet- en kommersiële telers verkoop.
Prof. Frikkie Neser van die departement vee-, wild- en weidingkunde aan die Universiteit van die Vrystaat het die beoordeling gedoen.