Kovsies delf in statistieke
Die RPO en die UV het ’n verslag geskryf oor die effek van die droogte op produsentevlak. Naas finansiële druk ervaar boere ook emosionele spanning. Liza Bohlmann kyk na die terugvoering gegrond op die antwoorde van die Vrystaatste deelnemers aan die onde
Die Rooivleisprodusente-organisasie (RPO) het ’n ondersoek gedoen na die werklike uitwerking van die droogte op die veeboer. Die eenheid vir lewendehaweekonomie aan die departement landbouekonomie van die Universiteit van die Vrystaat het die peiling onder 250 veeboere vir die RPO ontleed.
Die landbou-ekonome mnre. Frikkie Maré en Walter van Niekerk van die eenheid vir lewendehawe-ekonomie het die verslag oor die impak van die droogte in veeproduserende gebiede in Suid-Afrika saamgestel uit die statistieke wat die peiling na vore bring.
Die waardes in die studieverslag dui gemiddeldes aan, maar dit is uit die staanspoor duidelik dat veeboere in die land swaar getref is deur meer as een jaar se ondergemiddelde reënval. Van 2013 tot 2016 het die nasionale koeikudde met 15% afgeneem.
KUDDEBESTUUR
In sommige streke in die Vrystaat was die impak van die droogtetoestande reeds van die einde van 2014 sigbaar. In dele van die Oos-Vrystaat moes boere reeds van die begin van verlede jaar hul veekuddes verklein. Om die impak van die droogte te bestuur, het dié boere noodgedwonge al die aanwas van die vorige jaar verkoop. Slegs produksiediere is behou en die getal vervangingsdiere is erg ingeperk om die druk op hulpbronne te verlig.
Boere met besproeiingslande kon aanvullende veevoer verbou en ook oesreste as voerbron benut. Ekstensiewe veeboere wat net op veldweiding staatmaak, is tot breekpunt toe gedryf. In dié gevalle het veeboere hul speenkalwers vroeg gespeen om die druk op die natuurlike weiding te verminder. In sommige gevalle het boere aangedui dit is nie die moeite werd om geld te bestee om speenkalwers groot te maak nie. Die kalwers is so gou moontlik verkoop.
In die distrikte Brandfort en Hertzogville en in die suidelike dele van die Vrystaat moes boere noodgedwonge ouer diere laat slag en slegs vervangingsverse hou sodat hulle ná die droogte weer die kudde kan uitbou.
In uiterste gevalle moes boere hul kuddes bykans heeltemal uitdun. Hulle het dus die kudde se herhalingsvermoë verloor. Dié boere is verder uitgelewer aan kontantvloeiprobleme en regstreekse verliese aan diere wat weens die droogte gevrek het.
VOERSTELSELS
In die Vrystaat het veeboere groter skaapkuddes as beeskuddes. Weens verliese aan roofdiere en veediefstal in dié provinsie