Vrystaat kry dalk gou groen krag
Die Vrystaatse Goudveld kan binnekort aan die voorpunt van alternatiewe gasontginning wees wanneer ’n projek in bedryf gestel word waarmee steenkool ondergronds vergas word om elektrisiteit vir 50 000 huishoudings op te wek.
Die private maatskappy African Carbon Energy, ook bekend as Africary, beoog om oor die volgende minstens 20 jaar met die ondergrondse vergassing van 5 miljoen ton steenkool oor 150 ha tussen Theunissen en Welkom in die NoordVrystaat deurlopend elektrisiteit aan die nasionale Eskom-netwerk te verskaf.
Nog potensiële produkte wat plaaslik uit die ontginde gas vervaardig sal kan word, sluit diesel en kunsmis in. Die omgewingsvriendelike manier waarop dit gedoen sal word, vereis geen chemiese middels of breking nie, net suurstofverrykte lug en water.
Africary is ’n junior mynboumaatskappy wat bewese steenkoolreserwes besit. Hy het reeds al die sleutelaspekte van die Theunissen-projek gefinaliseer.
In die eerste fase van die projek sal 30 ton steenkool per uur vergas word.
Die maatskappy hoop om die elektrisiteitsaanleg teen begin 2019 in bedryf te stel as deel van die Departement van Energie se program vir onafhanklike kragverskaffers van elektrisiteit uit gas, sê dr. Johan van Dyk, internasionale vergassingspesialis en Africary se tegnologiebestuurder.
Ondergrondse steenkoolvergassing is ’n proses wat gebruik word om sintesegas 380 m diep in die steenkoolsoom te produseer. Die gas word deur spesiaal ontwerpte boorgate na die oppervlak gebring.
Lug word deur een boorgat na die steenkoolsoom ingevoer, waar dit met die steenkool reageer sodat die koolwaterstof in die