PRODUSENTE KOU HARDE BENE

Hoenderboere moet vanjaar kop bo water hou te midde van groot stygings in voerpryse, lae stygings in produsentepryse, ‘n groot toename in ingevoerde hoendervleis en ‘n nuwe pekelperk van 15% vir stukke aan die been.

Die produsenteprys in die eerste kwartaal vanjaar was gemiddeld R18,13/kg – 3,6% laer as in die vorige kwartaal en 0,8% hoër as in die eerste kwartaal verlede jaar.

Die invoer van stukke aan die been het luidens ‘n verslag van die SA Pluimveevereniging (SAPV) in die eerste sewe maande van vanjaar met 41,3% gestyg vergeleke met die ooreenstemmende tydperk verlede jaar.

Verlede jaar as geheel is 192 390 ton stukke aan die been ingevoer, met ‘n vry-aan-boordwaarde van R2,72 miljard. Dit was 22% meer as in 2014.

In die eerste ses maande van vanjaar het die meeste ingevoerde pluimveeprodukte uit Brasilië gekom (43,2%), terwyl invoer uit Europese lande saam 45,5% verteenwoordig het.

Kragtens ‘n ooreenkoms om Suid-Afrika deel van die Amerikaanse wet op groei en geleenthede in Afrika (Agoa) te hou, mag sowat 5 400 ton Amerikaanse hoenderstukke aan die been Suid-Afrika maandeliks sonder teenstortingstariewe binnekom.

Van Februarie tot Julie is onderskeidelik egter 2 299 ton, 6 906 ton, 807 ton, 1 238 ton, 2 398 ton en 1 746 ton van Amerikaingevoer. –CARIENKRUGER