’N GRYS TOEKOMS VIR ROOISTERTE

Die toekoms van die Afrikarooistertpapegaai is donker ná die verbod op die internasionale handel van dié spesie. Dít is die gevoel van die Suid-Afrikaanse papegaaitelers nadat op die COPS17-beraad van die konvensie oor internasionale handel in bedreigde spesies (Cites) besluit is om die beskermingsvlak van die voëlsoort van bylaag 2 tot bylaag 1 te verander.

Mnr. Ben Minnaar, voorsitter van die Papegaaitelersvereniging van Suider-Afrika, sê daar is geen uitbuiting van dié spesie in nege van die 20 gebiede waar die rooistertpapegaai natuurlik voorkom nie. “In die oorblywende gebiede is die uitbuiting ’n dekade gelede gestaak,” sê hy.

“Pleks van die beskerming van die rooistertpapegaai sal die opgradering van die bylaagstatus die teenoorgestelde uitwerking hê,” sê hy.

Volgens Minnaar sal die vraag na wild gevangde papegaaie toeneem as Suid-Afrika nie sy hokgeteelde voëls internasionaal mag bemark nie. Hy voer aan dat die smokkelhandel van die rooistertpapegaai sal toeneem, wat geensins in die belang van natuurbewaring is nie.

Suid-Afrika se sowat 100 000 broeivoëls van sowat 1 600 geregistreerde telers lewer jaarliks meer as 65 000 hokgeteelde kuikens in streng beheerde toestande. Die meeste daarvan word in die Verreen die Midde-Ooste verhandel. Sowat 5 000 hokgeteelde kuikens word jaarliks teruggehou vir broeidoeleindes.

–