GRENADELLAS VANJAAR GOEDKOPER

Grenadellaboere gaan in die komende seisoen nie weer die gunstige pryse sien wat hulle verlede jaar gekry het nie, sê mnr. Francois Badenhorst, grenadellaboer van Hazyview. Hy meen daar gaan vanjaar ’n groter voorraad op die mark wees.

“Verlede jaar het die droë hitte ’n rol gespeel en daar was minder en kleiner vrugte beskikbaar. Die gunstige wisselkoers het egter gesorg dat grenadellaboere goeie pryse vir uitvoerprodukte ontvang. Sedertdien het meer boere tot die bedryf toegetree en die beperkte mark sal vanjaar swaarkry,” sê Badenhorst.

Mnr. Johan Husselmann van die Landbounavorsingsraad (LNR) se Instituut vir Tropiese en Subtropiese Gewasse sê nuwe kultivars wat weerstand teen die ergste virusse en swamme bied, word tans geregistreer. “Dit is ’n langdradige proses, maar die LNR het nou sy perseel na Addo in die Oos-Kaap verskuif om van die virusse in die noorde af weg te kom. Hoewel die LNR reeds goeie resultate met die huidige seleksies behaal, is dit moeilik om ’n datum te voorspel wanneer dié nuwe kultivars beskikbaar sal wees.”

Volgens Badenhorst is die bedryf skepties oor die LNR se kultivars. “Ons weet nie meer of die kultivars ooit geregistreer sal word nie.” Volgens hom werk ’n paar mense by die LNR hard om die nuwe kultivars te registreer. “Die administratiewe rompslomp druk die proses bykans dood en dit is ’n groot frustrasie vir die ganse bedryf.”