GEVOLGE VAN SWAK DATA IS ’N ‘NAGMERRIE’
DIE gevolge van staatsdepartemente se onvermoë om landboudata met ’n sensus in te samel en die gebrek aan kundiges wat die data kan ontleed, is as ’n “nagmerrie” beskryf op ’n konferensie in Kaapstad.
Dr. Frikkie Liebenberg van die Universiteit van Pretoria sê die situasie word vererger deurdat die Departement van Landbou, Bosbou en Visserye nie met Statistieke SuidAfrika kon ooreenkom hoe om data in te samel nie.
Liebenberg sê volgens amptelike syfers produseer boere in SuidAfrika genoeg voedsel op die helfte van die bewerkte oppervlakte in 1960.
“Dit is dalk die waarheid, maar as jy die bewerkte oppervlaktes vergelyk met die beelde wat deur afstandswaarneming verkry is, word meer grond vir produksie gebruik.”
Die gemiddelde plaasgrootte het sedert die 1990’s die hoogte ingeskiet – ’n statistiek wat hy in twyfel trek omdat opnames by kommersiële boere sedertdien deur voorseleksie van ’n krimpende steekproef gedoen word.
“Arbeid is ’n ander gruwelstorie. Dit het in die verlede huis werkers ingesluit. Ons moet dit uithaal.
“Dan is daar die kwessie van seisoenswerkers, wat dikwels nie aangeteken is nie, of groot verskille veroorsaak tussen opnames wat in Augustus en Februarie gedoen is.”
’n Moedelose Liebenberg het gevra wat hulle moet doen om die regte syfers te kry.
“Elke keer wat ons probeer om potensieel omstrede syfers te kry om ’n behoorlike ontleding te doen, maak politici mense kwaad met hul uitsprake.
“Dan wil hulle nie die inligting wat ons nodig het, verskaf nie,” verduidelik hy. Prof. Ben Cousins van die instituut vir armoede, grond en landelike studies aan die Universiteit van WesKaapland het op dié geleentheid gesê beter statistiek is nodig.
“Daar moet ’n daadwerklike oproep wees vir ’n omvattende sensus wat ook kleinboere insluit. Ons moet weet wie die ander 30 000 kommersiële boere is wat die bevolkingsensus van 2011 opgeteken het, maar nie die 2007landbousensus nie.Waar is hulle? Hoe produktief gebruik hulle die grond?”
Prof. Ferdi Meyer van die Universiteit van Pretoria meen dit sal die beste wees as die Departement van Finansies só ’n sensus doen omdat dit vir hom lyk of dié departement die meeste gedoen kry.
‘Arbeid is ’n ander gruwelstorie.’