KUNSBUL VIR LEERLINGARTSE
Die Universiteit van Pretoria se fakulteit veeartsenykunde het die wêreld se eerste volwaardige laboratoriumbul vir die opleiding van veeartse bekend gestel.
Die kunsbul is in die fakulteit se vaardigheidslaboratium op Onderstepoort, Pretoria, bekend gestel. Prof. Dietmar Holm, adjunk-dekaan, sê dit lei ’n opwindende tydvak vir die opleiding van veeartse in Suid-Afrika in. “Ons vind deurentyd nuwe maniere om opleiding te verbeter en ons kan met reg trots wees op hierdie vernuwing.”
Die nuwe oefenbul is enig in sy soort. Daar is nog geen ander soortgelyke modelle vir opleiding nie. “Dit was nie iets wat jy vir die fakulteit kon gaan aankoop nie. ’n Hele aantal van die funksies op die bul het saam met die ontwerp gegroei tot op die vlak waar ons nou 16 verskillende prosedures op die bul kan doen,” sê hy.
Die bul is die geesteskind van dr. Annett Annandale, bestuurder van die vaardigheidslaboratorium. Dit het begin met die idee om ’n model te laat bou om die prosedure te vergemaklik om ’n bul se skede vir ’n geslagsiektetoets te skraap.
’n Veselglasbul met ’n jellaag is toe gebou. Die bul is op spesifieke dele met gewone beesvel oorgetrek en geslagsorgane, wat uit silikoon vervaardig is, is aangebring. ’n Pilatesbal dien as rumen, ’n rubberpyp as slukderm en ’n swembadpyp as lugpyp. ’n Regte pelvis, sakrum en stertwerwels is ook op die model aangebring.
Van die vaardighede wat op die model geleer kan word, sluit in ’n rektale palpasie om die stand van die prostaat te ondersoek, ’n palpasie van die skede en die skrotum, ’n skrotum-omtrekmeting en ’n skedeskraping. Die plasing van ’n maagpyp na die rumen, binneaarse en onderhuidse inspuitings, asook ’n epidurale narkose, kan op die model geoefen word.
’n Borgskap deur die dieregesondheidsmaatskappy Zoetis het dit moontlik gemaak om die bul met die samewerking van me. Liezel Kok, hoof van Anatomoulds, te bou. HEEL BO: MIDDEL BO: BO:
Mnr. Jacques de Jager van Zoetis sê dit is vir hulle ’n voorreg om by die projek betrokke te wees. “Ons het ’n strategie ontwikkel waarmee ons die fakulteit tot die beste van ons vermoë wil ondersteun tot voordeel van die hele veebedryf.”
Zoetis het ’n kompetisie vir die benaming van die bul gehou en dr. Roche Cronjé het met die wennaam “Inkunzoe” vorendag gekom. Dit is ’n vermenging van die Xhosa-woord vir bul (inkunze) en die naam van die maatskappy. ac.za.
Ghafsa Gamiet, e-pos: ghgamiet@sun.ac.za ,ofme.Cheryl Nieuwoudt, e-pos: cn2@sun.ac.za.