NUWE GRAAD OOR GESONDE KOS VIR ALMAL
Twee Matie-fakulteite span van aanstaande jaar af saam om ’n nuwe M.Sc.-graad aan te bied wat koskundiges oor voeding- en voedselsekerheid leer.
Die universiteit hoop dit sal beleidmakers en mense in nie-regeringsorganisasies help om ingeligte besluite oor koskwessies en voedselsekerheid te neem.
Die nuwe kwalifikasie is ’n tweejaar-graadprogram wat aanstaande jaar sal begin, sê me. Engela Duvenhage, woordvoerder van die fakulteit agriwetenskappe.
Die fakulteit agriwetenskappe se departement voedselwetenskap en die fakulteit mediese en gesondheidwetenskappe se departement interdissiplinêre gesondheidswetenskappe sal die nuwe graadkursus saam aanbied.
“Voedsel- en voedingsekerheid gaan nie net daaroor dat ons moet sorg dat niemand honger ly nie. Dit gaan ook oor hoe om te verseker dat genoeg van die regte soorte kos geproduseer word en dat alle landsburgers toegang het tot voldoende gesonde opsies,” sê prof. Gunnar Sigge van die departement voedselwetenskap.
“Dit is makliker gesê as gedaan, want armoede en werkloosheid speel ’n groot rol in hoe bekostigbaar en maklik dit vir mense is om ‘gesond’ te eet.”
Studente wat die tweejaarkursus volg, sal enkele blokkursusse in Stellenbosch moet bywoon. Andersins sal hulle danksy die universiteit se telematiese dienste afstandsonderrig ontvang en hul werkstukke voltooi. Hulle kan dus hul studies met hul bestaande beroepe kombineer.
Vereistes is ’n toepaslike B.Sc.-graad in die natuurwetenskap met ’n honneursgraad, ’n B.Sc.-graad in landbou, ’n vierjaargraad in gesondheidswetenskappe met ’n minimum slaagsyfer van 60% of ’n baccalaureus- en honneursgraad wat deur die universiteit se senaat goedgekeur is en op vlak 8 van die Nasionale Kwalifikasieraamwerk (NKR) is (ook met ’n 60%-slaagsyfer.)
’n Beperkte hoeveelheid studente sal jaarliks gekeur word met dieselfde slaagsyfer as hierbo.