Met ’n klein bietjie aandag aan banddruk kan ’n saaiboer ’n groot verskil aan sy inkomstestaat maak.
In ’n era van hemelhoë koste vir produksiemiddele en peperduur werktuie en toerusting maak talle boere nog die onnodige fout om af te skeep wanneer dit by bande kom. Op onlangse demonstrasiedae van die bandevervaardiger Trelleborg is die laaste ruk bewys dat banddruk en gewigbalansering ’n doeltreffende stuk gereedskap in ’n boer se kostebestuur-arsenaal kan wees.
Nuwe tegnologie, soos straallaagbande en elektroniese toepassings (apps), maak dit boonop eenvoudiger as ooit om op die land die nodige verstellings vir optimale werkverrigting te maak.
By Winterton in KwaZulu-Natal en Schweizer-Reneke in Noordwes is in die Trelleborg-demonstrasies bewys dat banddrukkorrigering tot meer as ’n derde aan dieselverbruik kan bespaar en tot byna ’n vyfde aan werkstyd.
Eksterne brandstoftenks is op albei die identiese trekkers in die onderskeie demonstrasies aangebring om die presiese verskil in dieselverbruik te meet.
Die tydverskil tussen die twee trekkers om onderskeidelik 250 m (by Winterton) en 300 m (by Schweizer-Reneke) oor ’n land af te lê, is tot op die sekonde gemeet.
Al vier bande van die kontroletrekker is tot 250 kPa gepomp. ’n Tweede trekker se banddruk aan die voor- en agterkant is volgens Trelleborg se elektroniese app, die Load Calculator, vir optimale werkverrigting gekorrigeer en gebalanseer.
In albei gevalle was die optimale banddruk laer as 200 kPa.
By Winterton het die trekker met die gebalanseerde en korrekte banddruk 11% minder diesel verbruik en by Schweizer-Reneke in ’n eerste lopie 27% minder en in ’n tweede lopie byna 36% minder. Die tydverskille was as volg: By Winterton was die gebalanseerde trekker 19% vinniger oor 250 m. By Schweizer-Reneke was die gebalanseerde trekker in die eerste lopie 11% vinniger as die kontroletrekker en in die tweede lopie 17% vinniger oor 300 m. BO: PLAASINLIGTING KORTOM
■ Danksy die korrekte, gebalanseerde banddruk kan trekkers tot 19% vinniger ry as ’n eweknie met ’n hoër banddruk en tot 36% brandstof bespaar. ■ Benewens die kostebesparing is die korrekte banddruk ook van die uiterste belang om grondverdigting te beperk. ■ Danksy toepassings kan die korrekte
banddruk gratis en vinnig bereken word.
VERSPREI GEWIG TEEN VERDIGTING
Benewens die ooglopende besparings aan koste en tyd is banddrukbalansering ook van die uiterste belang om grondverdigting tot die minimum te beperk.
Met straallaagtegnologie is dit nou moontlik om met laer banddruk te werk, verduidelik me. Jeanne Hands, streeksbestuurder van Trelleborg in KwaZulu-Natal. Die bandwande kan verder buig sonder om te verweer en te beskadig, sodat die spoor vergroot, die trekker of werktuig se gewig oor ’n groter oppervlak versprei word en verdigting ingeperk word.