Ken en verstaan ’n mielieplant se groeistadiums
Verwysings na ’n mielieplant se groeistadiums word oral in die bedryf gebruik. Maar wat beteken hierdie verwysings na die groeistadium en hoe kan die boer die waarde van hierdie inligting ontsluit? vra mnr. Steve Nel van Bayer.
Dit is nuttig om die verskillende groeistadiums van ’n mielieplant te ken. Hierdie kennis laat die boer toe om die korrekte plaagdoders (swamdoders, insekdoders en onkruiddoders) en bemesting op presies die regte tye toe te dien sodat die plante so gesond moontlik bly en die oes ’n maksimum opbrengs lewer.
Die mieliegroeiskaal is in twee stadiums verdeel, naamlik die vegetatiewe (V-) stadium en die reproduktiewe (R-) stadium.
Die vegetatiewe groeistadium van ’n mielieplant is van die oomblik dat die saad ontkiem en die plant uit die grond kom tot wanneer die blare hul volle grootte bereik het en die plant pluime wil begin vorm. Tydens die vegetatiewe groeistadium is die plant daarop toegespits om voedingstowwe te versamel en op te berg vir die reproduktiewe stadium.
In teenstelling daarmee is die reproduktiewe stadium toegespits op die produksie van pitte. Daarvoor word die energie uit die vegetatiewe groeistadium benut.
Dit kan moeilik wees om die presiese vegetatiewe groeistadium van ’n mielieplant te bepaal, hoewel dit geensins onmoontlik is nie. ’n Akkurate manier is deur die aantal blare te tel wat ’n kraag gevorm het.
Die eerste stadium in die vegetatiewe groei van ’n mielieplant is die opkomstadium wanneer die eerste blare uit die grond te voorskyn kom. Sowat twee tot drie dae ná opkoms sal FOTO 1: 5 3 FOTO 2: 1 4 2 ’n kraag op die saailing sigbaar wees (sien FOTO 1 ). Wanneer die eerste kraag aanwesig is, het die plant V1 bereik. V2 word bereik wanneer die tweede kraag op die saailing sigbaar raak, sowat ’n week later. Dit hou aan totdat die plant by V18 of by pluimvorming (VP) volle volwassenheid bereik.
Dit is belangrik om daarop te let dat wanneer die mielieplant V6 bereik, raak die plant se stam aansienlik dikker en dan kan van die onderste blare afval. Dit is dus belangrik om die aantal blare met krae te tel.