HOENDERBOERE VAN SA EN VSA ‘KAN VENNOTE WEES’
DIE Suid-Afrikaanse en Amerikaanse pluimveebedryf kan vennote wees om saam die robuuste geleenthede in Suider-Afrika te ontwikkel, sê sen. Chris Coons.
In Suid-Afrika is daar egter “wanbegrip en wankarakteriserings” van die gehalte van Amerikaanse hoender en Amerika se bedoeling om uitvoergeleenthede te soek, het Coons in die Amerikaanse deelstaat Delaware aan ’n besoekende groep Suid-Afrikaanse joernaliste gesê.
Coons het by ’n verwerkingsaanleg van Mountaire Farms, die sewende grootste geïntegreerde pluimveeprodusent in die land, met die groep gepraat.
Hy het in 2014 en 2015 hard baklei dat Suid-Afrika sy hoendermark oopstel vir die invoer van Amerikaanse hoenderstukke aan die been, as voorwaarde om deel te kon bly van die Amerikaanse wet op groei en geleenthede in Afrika (Agoa).
Coons het gesê as politikus verstaan hy dat karakteriserings plaasvind wanneer ’n debat baie warm is. “Dit is egter nou tyd om maniere te vind om mekaar te respekteer en saam te werk.”
Die pluimveebedryf is ’n baie belangrike deel van die ekonomie van Delaware, ’n klein staat aan die Amerikaanse Ooskus.
“Ek is van ’n staat waar twee motoraanlegte moes toemaak. Mense hier was ontsteld dat Suid-Afrika toegelaat word om (motorprodukte) tariefvry na Amerika uit te voer, maar die belangrikste landbouproduk (hoender) van my staat kon (weens teenstortingstariewe) nie uitgevoer word nie.”
Ingevolge Agoa geniet Suid-Afrika tariefvoordele vir die uitvoer van sowat 1 800 produkte na Amerika.
Oor die hoenderkwessie is sowat twee jaar lank onderhandel. Dit het uiteindelik gelei tot ’n ooreenkoms dat 65 000 ton hoenderstukke aan die been in elke tydperk van 12 maande Suid-Afrika sonder teenstortingstariewe mag binnekom.
Coons het gesê hy het gehoop ’n wen-wen-situasie sou vir albei lande bereik kon word, en dat daar ’n vennootskapsverhouding sou
BESTE MOERKWEKER ‘PRODUSEER VOLHOUBAAR’
BO: LINKS: ontwikkel het waarin vaardighede en tegnologie uitgeruil sou kon word, buitelandse belegging sou plaasvind en geleenthede in die Suid-Afrikaanse pluimveebedryf verbeter sou word.
Amerika is volgens hom een van die wêreld se voorste pluimveeprodusente wat sowat 20% van sy produkte uitvoer.
Hy beskou Suid-Afrika as “die anker” van die Suider-Afrikaanse streek en sê daar is byna onbeperkte potensiaal vir die twee lande se bedrywe om saam ’n robuuste pluimveebedryf in Suid-Afrika te ontwikkel.
“Pluimvee is die proteïen wat die meeste belofte inhou vir ’n honger vasteland en planeet.”
In albei lande is daar groot ongelykhede rakende toegang tot geleenthede en hulle kan by mekaar leer oor projekte wat gewerk het.
Coons het gesê hy verstaan die moeilike omstandighede waarin die Suid-Afrikaanse pluimveebedryf weens die droogte en stygende invoer is.
“Miskien moet jul Regering die lande (van waar die meeste hoender ingevoer word) vra wat hulle doen sodat jul bedryf kan ontwikkel en mededingend raak”.
– Die mediagroep se toer na Amerika is deur die Amerikaanse raad vir die uitvoer van pluimvee en eiers (USAPEEC) moontlik gemaak.