DIE ANDER SÊ

’n Volhoubare voedselstelsel wat voedingswaarde ’n voorrangsaak maak, vermorsing tot die minimum beperk en werk skep, is noodsaaklik in SuidAfrika, ’n land waarin die helfte van huishoudings nie voedselsekerheid het nie, het mnr. Scott Drimie, direkteur by die SuidAfrikaanse Voedsellaboratorium, in die sakeblad Business Day geskryf.

Verstedeliking, die neiging om kos te koop pleks van om dit self te produseer, ’n afname in landboubeleggings, die uitputting van die land se visvoorraad en die toenemende veranderlikheid in reënval dra alles by tot betekenisvolle veranderinge in die SuidAfrikaanse dieet. Boonop bestee huishoudings met ’n lae inkomste tot twee derdes van hul inkomste aan kos, wat lei tot ’n bevolking wat goedkoper, hoëenergie geriefskos met min voedingswaarde verkies.

Kos, water en energie is interafhanklik van mekaar, maar SuidAfrika benader dit as silo’s en daarom slaag die land nie met ’n volhoubare stelsel nie. Die produksie, vervoer, verpakking en opberging van voedsel vereis energie. Terselfdertyd word die meeste van die land se energie deur steenkoolaangedrewe kragsentrales opgewek wat weer die waterbronne besoedel en inspeel op klimaatsveranderinge – alles met ’n ongunstige uitwerking op gewasproduksie.

SuidAfrika het ’n tekort aan kos, water en energie en dit kan nie langer as afsonderlike hulpbronne gesien word nie. Die enigste lewensvatbare oplossing is ’n geïntegreerde benadering.