Reënvooruitsigte beter
ONSEKERHEID voer steeds die botoon in weervooruitsigverslae vir Suid-Afrika se somerreëngebied. Die nuutste aanduidings voorspel natter toestande as aanvanklik verwag in die vroeë en midsomer (November tot Februarie), sê die SA Weerdiens in sy nuwe seisoensvooruitskouing.
Dit lyk ook of die warmer as gemiddelde temperature wat aanvanklik vir hierdie tyd verwag is, minder striemend kan wees.
Die Weerdiens voeg egter by dat die onsekerheidsfaktor steeds redelik hoog is. Daar is nie sterk tekens dat ’n amptelike La Niña – wat die kans op natter toestande sal verhoog – wel aan die ontwikkel is nie. “Die publiek word gewaarsku dat die land in die greep van ernstige droogtetoestande is. Dit is belangrik om ontwikkelings dop te hou wat die heersende vooruitsigte vir die somerseisoen kan verander.”
Die ENSO-indeks, wat op die klimaatverskynsels El Niño en La Niña dui, het in Oktober tekens van die ontwikkeling van ’n swak La Niña gewys.
Die meeste internasionale vooruitskou-modelle wys egter die kans op ontwikkeling van so ’n swak La Niña in vanjaar se somer verskraal. “Volgens hierdie modelle kan die verwagte La Niña-ontwikkeling afneem voordat dit volwassenheid of die status van ’n amptelike La Niña bereik,” lui die verslag.
Intussen hou somersaaiboere die land oor asem op. In die oostelike dele van die somersaaigebied, waar boere nog tot middel November het om binne die optimale planttyd mieliepitte in die grond te kry, het dit sedert begin Oktober redelik wyd gereën, en word daar in groot dele volstoom geplant.
In die westelike dele kan daar nog op reën gewag word. Dié gebiede se optimale mielie-planttyd begin eers middel November, en duur tot middel Desember.
Van die distrikte waar daar sedert September tot middel verlede week (2 Nov.) redelike neerslae aangeteken is, is Bethlehem (70 mm), Frankfort (66 mm), Heilbron (64 mm), Marquard (63 mm), Ventersburg (71 mm), Lichtenburg (63 mm), Amersfoort (68 mm), Balfour (74 mm), Ermelo (115 mm), Hendrina (69 mm), Irene (80 mm), Middelburg (86 mm), Piet Retief (73 mm) en Standerton (63 mm).
–
Om die weer se patrone en nukke te voorspel, is nie ’n maklike taak nie – vra maar vir prof. Peet Pienaar, een van SA se bekendste weerkykers. Landbou.com het met hom gesels oor die vooruitsigte in die winter- en somerreëngebied*.
WINTERREËNGEBIED
SOMERREENGEBIED