Groot name aangestel by KWV ná Vasari-oorname

MNR. Boyce Lloyd, wat nou betrokke was by die AB Imbev/ SAB Miller-samesmelting, sal van vandeesmaand af die leisels hou as hoof- uitvoerende beampte by KWV.

’n Transaksie waartydens Vasari die KWV se bedryfsbates vir R1,15 miljard gekoop het, is suksesvol voltooi ná reusesteun uit aandeelhouersgeledere en met die SA Mededingingskommissie se goedkeuring.

Luidens Vasari se aankondiging is Lloyd ’n senior uitvoerende direkteur van SABMiller, met meer as twee dekades se ondervinding in Afrika en Latyns-Amerika. Sy mees onlangse pos was as direkteur van integrasie vir die AB Imbev/SABMiller-samesmelting.

Vasari se mnr. Pedro Lotra sal die KWV se voorsitterstoel beklee. Mnr. Ken Allan, voorheen van die drankmaatskappy Diageo, is aangestel as uitvoerende hoof vir Suid-Afrikaanse markte.

Vasari het meer as drie dekades se ervaring van handelsmerk-verbruikersgoedere. Die groep is teenwoordig in Afrika, Asië en Europa.

Volgens mnr. Vivian Imerman, voorsitter van Vasari, beskou hulle die KWV as ’n strategiese bate wat groeigeleenthede in die wyn- en brandewynbedryf inhou. “Dis ook ’n groot stap vorentoe om ’n handelsmerkhuis Volgens Lotra sal hulle die sterk KWV-handelsmerke (wyn en brandewyn) gebruik om verbruikers se harte te wen.

“Die groei in verskeie gevorderde markte, soos Europa, het gestagneer, maar in Asiatiese markte geniet die verbruik van veral Suid-Afrikaanse wyn waardering en groei.

“Ons sal voordeel trek uit neigings, soos premium-wynverbruik, voortgedryf deur ’n meer gesofistikeerde palet en die herlewing van ’n portefeulje met gevestigde handelsmerke.”

Imerman sê hulle bied nou ’n breër reeks produkte aan klante in nuwe markte.

–