‘VERMINDER BEWERKING NÓÚ’
Selfs met normale reënval gaan Suid-Afrika se besproeiingboere en ander waterverbruikers in die volgende paar jaar aan waterskaarste uitgelewer wees.
Me. Felicity Michell, adjunkbestuurder van die Kwazulu-Natalse departement van landbou en landelike ontwikkeling se afdeling vir hulpbronbestuur, sê die droogte is nog nie verby nie en waterbeperkings gaan nog lank geld. Uit party damme word geen onttrekking vir besproeiing meer toegelaat nie en uit ander is die besproeiingbeperking 50%.
“Ons watervoorraad is op ’n kritieke vlak. Daar is boonop gewoonlik ’n tydsverloop vanaf betekenisvolle neerslae, wat genoeg is vir afloopwater, tot wanneer grondwater en waterdraers uiteindelik aangevul word. Dit gaan ook met ’n hoë erosierisiko gepaard,” het Felicity op die jaarlikse bewaringslandboukonferensie van KwaZulu-Natal se geenbewerkingsklub op Bergville gesê.
Sy het ’n beroep op besproeiingsboere gedoen om in die tye van waterskaarste bewerking te verminder en na geenbewerking oor te skakel. “In Suid-Afrika is droë jare algemener as nat jare. Beplan altyd vir die ergste. Geenbewerking is internasionaal op die voorpunt in die stryd om grondwater doeltreffender te benut,” het sy gesê.
Sy het ook daarop gewys dat verbeterde voedingstatus ’n plant se watergebruiksdoeltreffendheid verbeter sodat meer droëmateriaal met minder water gekweek word.
Sy het ook verwys na navorsingsresultate wat toon dat suurder grond in gebiede met ’n hoër humiditeit gepaardgaan met ’n hoër transpirasietempo by plante. Plante in dié gebiede is dus meer aan droogteskade uitgelewer. Kalktoediening kan die probleem verlig en terselfdertyd die pH verhoog om te verseker dat meer plantvoedingstowwe vir opname beskikbaar is. – MARLEEN SMITH