Pluk die vrugte van FarmTrack
Tyd is geld. Daarom is dit tot ’n boer se voordeel as hy deurentyd kan sien wanneer, waar en hoe vinnig sy werktuie beweeg.
Met FarmTrack kan ’n boer enige tyd sien wanneer die trekkers beweeg, teen watter spoed en dit dan met die kalibreringspoed vergelyk, sê Johan Pienaar, produksiebestuurder van ’n sharonvrugplaas buite Swellendam in die Wes-Kaap.
“Jy kan ook sien hoe lank die bestuurder stilhou en hoe lank dit duur om brandstof in te neem. As ’n plaasbestuurshulpmiddel is dié toestel van onskatbare waarde.”
Johan gebruik al die afgelope vyf jaar FarmTrack. Dit is ’n eenvoudige, dog doeltreffende GPS-moniteringstelsel op sy plaasvoertuie.
Hy is veral tevrede met FarmTrack se tegnologiese vordering – veral omdat Suid-Afrika die enigste land in die Suidelike Halfrond is waar sharonvrugte verbou word. Pienaar gebruik FarmTrack op vier sharonvrugpersele – twee by die Buffeljagsrivier en twee by Bonnievale.
Een van die grootste voordele van die gebruik van hierdie soort toestel lê in die breë oorsigverslagleweringsmetode wat uit die FarmTrack-tegnologie verkry word. Die kartering van die voertuig se bewegings beteken die risiko om nie ’n ry te bespuit nie, word grootliks uitgeskakel.
Met FarmTrack kan bestuur hul personeel aanspreeklik hou volgens meetbare standaarde.
“Ons kan hul spoed monitor deur die maksimum spoed in die eenheid te programmeer. Ons ontvang ’n waarskuwing as daardie spoed oorskry word. Omdat die eenheid op die trekkers bly, kan ons sien wanneer slak-aas toegedien of geploeg is.”
Aantekening word ook gehou van die ure wat trekkers werk, wat weer help met diensrekords.
Al hoe meer Suid-Afrikaanse boere gebruik tegnologie om hul plaas se produksieproses en algemene bestuur te verbeter. FarmTrack is ’n kostedoeltreffende hulpmiddel waarmee boere nie net hul voertuigdoeltreffendheid kan monitor nie, maar ook brandstofbesparing, gewasbeskerming en optimale gewasuitset.
“InteliGro, die verspreidingsmaatskappy, bied puik diens. Ons is dankbaar dat Oostewald Eksteen ons deur die groeipyne met die gebruik van dié produk gehelp het. Ek beveel FarmTrack aan; dit is werklik doeltreffend,” sê Johan.