Continental, een van die grootste vervaardigers van bande en voertuigveiligheidstelsels ter wêreld, is vasbeslote om padongelukke heeltemal uit te wis.
Talle maatskappye en boere gebruik groot voertuie om hul produkte te vervoer. Die veiligheid van die bestuurder sowel as die voertuig is egter net so belangrik soos die produk wat vervoer word. Continental bied die oplossing.
Continental se Vision Zeroveldtog is ’n wêreldwye langtermynstrategie van dié maatskappy se onderskeie voertuiggerigte afdelings, asook sy strategiese vennote. Dit behels ’n vernuwende, allesomvattende benadering tot padveiligheid met die doelwit om uiteindelik padongelukke, en die gepaardgaande beserings en sterftes, heeltemal uit te skakel.
MAATREËLS
Sedert sitplekgordels, lugsakke, elektroniese stabiliteitsbeheer, banddrukmonitors en ABS-sluitweerremme in Europa verpligtend geword het, het die getal padongelukke, beserings en padsterftes aansienlik gedaal.
Dieselfde neiging word weerspieël in ander lande waar dié aktiewe en passiewe veiligheidstelsels algemeen voorkom.
Van spesifieke belang vir die vragmotormark is die baandwaalwaarskuwingstelsels wat sedert 2013 in Europa vir alle vragmotors van 3,5 ton of swaarder verpligtend is, sowel as vir busse met meer as agt sitplekke. Dié regulasie is intussen ook in Japan bekragtig.
WAARSKUWING
Europa en Japan lewer ’n groot persentasie van die vragmotors en busse wat na Suid-Afrika ingevoer en hier verkoop word, en dus is dit belangrike tegnologie wat ook plaaslik in gebruik is.
Dit speel ’n belangrike rol in die voorkoming van ongelukke wat deur bestuurderuitputting veroorsaak word. Moeë bestuurders wat konsentrasie verloor of aan die slaap raak, is trouens een van die voorste oorsake van padongelukke.
Die baandwaalwaarskuwingstelsel gebruik kameras wat vorentoe kyk, asook infrarooisensors wat onder die voertuig gemonteer is. Hierdie sensors en kameras aktiveer die stelsel wat die bestuurder waarsku wanneer die voertuig die pad begin byster raak.
Baanblyhulp neem dié tegnologie nog ’n stap verder. Dit kan geleidelik stuurinsette lewer om die voertuig op koers te hou, wat ook toelaat dat die bestuurder vinniger beheer kan herwin.
TEKKIES OP TEER
ContiPressureCheck is nog ’n waardevolle stelsel wat padveiligheid daadwerklik verbeter. Dit is ’n gevorderde banddrukmonitorstelsel wat spesifiek vir handelsvoertuie ontwikkel is en ook die bedryfskoste van voertuigvlote kan verlaag.
Dié tegnologie is deel van Continental se Conti360°-vlootdiens, ’n professionele, allesomvattende bandediens vir vlooteienaars wat op veiligheid, Die stelsel is vir ’n groot verskeidenheid handelsvoertuie beskikbaar – van enkelas-sleepwaens tot sesas-voertuie met tot 24 wiele. Dit is vir trekkers, sleepwaens en busse beskikbaar, en kan maklik by die voertuig se vloot- en telemetriestelsels geïntegreer word. Die vlootoperateur kan dus die inligting oor banddruk en bandtemperatuur direk monitor en dadelik waarskuwings oor afwykings kry.
Buiten die banddrukmonitorstelsel bied die Conti360°-vlootdiens die ContiFleetCheckdiens vir die gereelde nagaan van bande. Die ContiBreakdownService-bystanddiens is ook beskikbaar. Vlooteienaars kry daarmee bystand met pap en stukkende bande – die voertuig kan dus so gou moontlik weer padwaardig wees.
ContiFleetReporting is ’n program wat ’n volledige ontleding van bandeverrigting opstel, en só kostebesparings kan bewerkstellig.