Teel sappiger steaks met Wagyu
Vleis behoort méér as net ’n kommoditeit te wees. Telers wat meer aandag gee aan die teling van diere met goeie vleiseienskappe, sal die vrugte pluk. Met die Wagyu-teelmateriaal in sy stal het Taurus Evolution die regte medisyne hiervoor.
Die Wagyu-bees wen veld in Suid-Afrika danksy die uitstekende marmering van sy vleis. Dié Japannese ras word toenemend in suiweren kruisteling gebruik. As jy eers een keer die Wagyu se vleis geëet het, sal jy verstaan waaroor die bohaai gaan en hoekom dié steaks peperduur is.
“Die Wagyu-beesras word al hoe meer in Australië in kruisteling gebruik om die gehalte van beesvleis te verbeter om ’n aangename eetervaring vir die verbruiker te verseker,” sê mnr. Carel Teseling, bestuurder van die Australiese Wagyu-genootskap se tegniese diens. Hy was in ’n spreker op die Aldam-vleisbeesskool tydens die plaasbesoek aan die Woodview Wagyu-kudde.
Mnr. Brian Angus van die Woodview-stoeterye (Angus en Wagyu) naby Arlington in die Vrystaat is die baanbreker van Wagyu-teling in Suid-Afrika. Ná meer as 17 jaar se intensiewe teling, navorsing en bemarking kan hy die waarde van hierdie ras onderskryf.
“Die ras is dalk nie die mooiste vleisbeesras nie, maar as die vel af is, gaan dit oor die karkas. Geen ander ras kan vergelyk met die gehalte en smaak van die Wagyu nie. Boere wat die gehalte en gesogtheid van die vleis wat hulle produseer, wil verbeter, kan dit met Wagyu-teelmateriaal regkry. Vir stoettelers is daar ’n groot geleentheid om hierdie gesogte diere te teel,” sê Brian.
BELEGGING
Woodview gebruik embrio’s en ook saad uit bulle, soos Michifuku, Takazakura en die Westholm-teelbulle Hirashige Tayashu ETJ001 en Kitateruyasu Doi ETJ003.
As ’n belegging is die ras baie aanloklik vir telers, soos by Woodview se produksieveiling in September duidelik was.
Tydens dié veiling is Suid-Afrika se eerste rooi Wagyu-beeste teen altesaam R1,86 miljoen verkoop. Twee bulle is teen R520 000 elk en twee verse teen R410 000 elk op dié produksieveiling gekoop. Swart en rooi Wagyu’s, altesaam 29 vroulike diere en ses bulle, was te koop. Die vroulike diere het gemiddeld R240 000 gehaal en die bulle gemiddeld R276 000.
“Dit was die eerste keer dat die rooi Wagyu-bloedlyn op ’n produksieveiling aan telers in SuidAfrika beskikbaar was. Hierdie vroulike diere het hulself in ons kudde bewys.
“Ek sien ’n goeie toekoms vir die rooi Wagyus. Rooi beeste is tradisioneel gewilder in die plaaslike mark as beeste van ander kleure. Boonop sal die Wagyu-teelmateriaal die vleisgehalte van rooi kommersiële kuddes in die land verbeter,” sê Brian.
TEELMATERIAAL
“Taurus Evolution het die Wagyu-bul Oak Valley KitateraET Ben T’Son beskikbaar,” sê dr. Anton Smit, uitvoerende hoofbeampte van die semenmaatskappy Taurus Evolution. Hy sê die ras verleen hom daartoe om sy puik vleiseienskappe aan Suid-Afrikaanse kommersiële kuddes oor te dra.
Ben T’Son is uit die bekende Michifuku-bloedlyn. Michifuku was in ’n stadium die topbul in Amerika wat marmeringseienskappe betref. 076 286 9443; anton.smit@ taurus-evolution.com.