DIÉ WEEK IN DIE LANDBOU
DIE ANC IS HAASTIG
“As ons nie met die nodige spoed beweeg nie, sal ons net meer en meer grond verloor,” sê die ANC-parlementslid mnr. Patrick Maloyi oor die verlies aan landbougrond in Suid-Afrika. Die ANC-koukus is bekommerd dat die wetsontwerp op die behoud en ontwikkeling van landbougrond dalk só lank sal sloer dat nóg landbougrond vervreem kan word. Hy wil hê die betrokke portefeuljekomitee moet sake in hul eie hande neem en ’n private ledevoorstel by die Parlement indien as die wetgewing te lank sloer. Dié wet is tans oop vir kommentaar en word oorweeg deur die bedingingsliggaam Nedlac. Sien bl. 16.
AFRIKA TOE!
Afrika was verlede jaar Suid-Afrika se top-uitvoerbestemming vir landbouprodukte, met ’n markaandeel van 58%, volgens ’n nuwe verslag van die Nasionale Landboubemarkingsraad. Daarna volg die Europese Unie met 29% en die Asiese mark met 13%. Landbouprodukte ter waarde van altesaamR111,9 miljardisuitgevoer en R76 miljard s’n is ingevoer. Tussen 2012 en 2015 het die waarde van veral vrugte-uitvoer skerp gestyg, onder meer weens die verswakking van die rand. Die uitvoer van suurlemoene en lemmetjies het gestyg met 80%, vars appels (29%), vars druiwe (24%), wyn (21%) en lemoene (20%).
NUWE WYNBASE
Die bedryfsorganisasie VinPro se raad het mnr. Anton Smuts, eienaar van die wynplaas Lucerne in die distrik Robertson verkies as sy nuwe voorsitter, en mnr. Philip Retief, uitvoerende hoof van Van Loveren, ook in Robertson, as die nuwe ondervoorsitter. Smuts se voorganger, mnr. Abrie Botha, beklee dié pos sedert 2003, en die vorige adjunkvoorsitter, mnr. Johann Krige, het dié pos beklee sedert VinPro se stigting. Mnr. Smuts is sedert 2004 VinPro se streekdirekteur vir Robertson en dien ook in die raad van Bonnievale Wynkelder, Winetech en die Instituut vir Druiwe- en Wingerdwetenskap. VinPro verteenwoordig nagenoeg 3 500 Suid-Afrikaanse wynprodusente.
WEN JOU EIE HOMMELTUIG
Jy kan ook ’n Haevic DJI Phantom 4hommeltuig, én opleiding oor bruik, wen deur vir
Landbou.com ’n video van jou slimste boereplan aan te stuur. Die video moenie langer as 2 minute wees nie. WhatsApp jou video na sel 063 720 3632. Dié kompetisie sluit op 9 Desember. Besoek http://bit.ly/2fc52su vir meer besonderhede.
MEKKA VIR MELK
Clover het ’n sentrum by sy Clayville-aanleg in Midrand geopen waar besoekers kan leer hoe melk van die plaas tot op die winkelrak kom. Die sentrum het R40 miljoen gekos en sluit ’n nuut geboude ouditorium, asook verbouings by die bestaande aanleg in. Besoekers kan onder meer van bo af deur vensters kyk na wat op die fabrieksvloer gebeur. Hulle leer ook meer oor die toets van melk, asook die verpakkings-, opbergings- en versendingsproses. Die sentrum sal van volgende Februarie af oop wees vir besoekers. Besprekings kan op Clover se webblad gedoen word.
GRENS-INSIDENTE
Suid-Afrika behoort amptelik beswaar te maak by die Lesotho-regering oor die toename in gewelddadige plaasaanvalle wat in die Oos-Vrystaat voorkom, meen dr. Johan Burger, ’n vooraanstaande misdaadkenner van die Instituut vir Veiligheidstudies. Hy sê die aanvalle is “’n growwe skending van die internasionale grens tussen Suid-Afrika en Lesotho”. Dit volg nadat veediewe verlede Woensdag op twee boere en polisiebeamptes in die Bothasberg-omgewing naby Kestell begin skiet het toe laasgenoemde verdagte bewegings naby ’n veekamp opgemerk het. Geen vee is gesteel nie en die aanvallers het vermoedelik oor die Lesotho-grens gevlug. Sien ook Landbou.com.
WÊRELDBOER
Die Limpopo-leierboer en landboukundige dr. Theo de Jager is deur die Wêreldorganisasie vir Boere (WFO) genader om namens alle boere by die Cop22-klimaatberaad in Marrakesh, Marokko, as spreker op te tree. Hy het onder meer die behoefte aan ’n omvattende finansieringsraamwerk en ’n belegging in navorsing uitgelig as aangeleenthede wat dringend aangepak moet word sodat boere in ontwikkelende lande die gevolge van klimaatsverandering die hoof kan bied. De Jager kon as gevolg daarvan nie persoonlik sy eerbewys as die SA Landbouskrywers se Landboukundige van die Jaar in ontvangs neem nie. Sien bl. 24.