WESTE BEGIN OPTIMISTIES PLANT
PLANTTYD het op ’n betreklik optimistiese noot begin in die westelike deel van die somersaaigebied nadat die eerste neerslae in ’n lang tyd vir ’n slag weer water in die grond gesit het.
Mnr. Jannie de Villiers, uitvoerende hoof van Graan SA, sê hoewel daar steeds droë kolle is, het planttyd in die algemeen goed begin omdat daar baie meer grondvog as ’n jaar gelede is.
Dr. Dirk Strydom, landbouekonoom by Graan SA, beaam dat almal ná die uitmergelende droogte na ’n nuwe seisoen uitsien waarin hopelik weer goeie oeste afgehaal sal kan word.
Gunstige reënvooruitsigte in die jongste tyd behoort tot goeie aanplantings by te dra. As boere by hul voorneme hou om amper ’n derde meer mielies as verlede jaar aan te plant, kan die nasionale oes weer by 12 miljoen ton draai mits gemiddelde opbrengste normaal is, sê Strydom.
BELOWEND
In die afgelope seisoen is net 7,54 miljoen ton mielies gelewer, verreweg die kleinste oes van die afgelope dekade. Die kommersiële binnelandse verbruik vir voedsel en veevoer was net onder 10 miljoen ton.
Boere het teen middel Oktober, toe die Nasionale Oesskattingkomitee sy gebruiklike opname oor voornemens om te plant gedoen het, aangedui dat hulle beoog om 27% meer geel mielies as verlede jaar aan te plant en 43% meer wit mielies.
Strydom sê hoewel die westelike dele van die somersaaigebied nog nie uitermatig baie reën gekry het nie, lyk weervoorspellings belowend. Daar is nog tyd voordat die planttydperk vir goeie opbrengste verstryk.
Hy maan nogtans dat baie water nog in die see moet loop voordat ’n skaflike oes gelewer kan word.
Midsomer, tradisioneel die gevaarlikste stadium van die sei soen vir somersaaiboere, lê nog voor. As die gebruiklike midsomerdroogte vanjaar weer hard slaan, het min boere soos in ander jare ’n buffer van opgegaarde grondvog om op terug te val.
Die meeste klimaatvooruitskoumodelle voorspel in dié stadium naby normale reënval in Desember en Januarie.
OORSKOT?
De Villiers het die moontlikheid van ’n nasionale oorskot mielieoes geopper.
Graan SA raam dat rondom 85% van die mielies in Mpumalanga reeds geplant is. Dié provinsie het vanjaar 30% van die nasionale oes gelewer, en die vorige jaar sowat ’n kwart.
As die weer saamspeel, gaan boere se groot uitdaging waarskynlik die tydige bemarking van hul graan wees. Beter oeste en gunstige weervooruitsigte sal druk op produsentepryse plaas.
Pryse het beduidend verswak van begin vanjaar se rekordhoë vlakke. Die Safexwitmielieprys het vanaf 20 Januarie se hoogtepunt van R5 280/ton teruggesak tot R3 490/ton op 10 November, en sedertdien danksy die swakker rand versterk tot meer as R4 000/ton.