SYLVANIA BAKLEI VIR NYLMYN
SYLVANIA Platinum se Volspruitmynmaatskappy het in Junie vanjaar geappèlleer teen die provinsiale regering van Limpopo se besluit om toestemming vir ’n myn in die Nyl-vloedvlakte naby Mokopane te weerhou.
Nadat belangegroepe beswaar teen die appèl aangeteken het, het mnr. Albert Jordaan, projekbestuurder van die beoogde Volspruit-myn, aan Landbouweekblad gesê dié oopgroef-plati- nummyn wat op die oewer van die Nylrivier beoog word, sal R1,5 miljard per jaar aan uitvoer verdien en 307 werkgeleenthede skep. Volgens hom sal daar saam met geleenthede wat na verwagting in die verskaffingsketting geskep sal word, 1 869 werkgeleenthede vir die duur van die myn se 20 jaarleeftyd geskep word. Daar woon glo tot 400 000 mense in die munisipaliteit Mogalakwena waarbinne die myn sal funksioneer.
Dit is oor dié mense wat mnr. Emile Honiball, regsverteenwoordiger van die Nyl-aksiegroep, besorg is. Hy voer aan dat omgewingshulpbronne só bestuur moet word dat dit vir toekomstige geslagte nog waardevol kan wees. Honiball is veral bekommerd oor die impak wat die myn op die ondergrondse watertafel kan hê. Boere in die omgewing steun swaar op dié grondwater. Die nabygeleë dorp se munisipale water kom uit dieselfde bron.
Jordaan beskuldig egter boere daarvan dat dit juis hulle is wat die waterbron onder druk plaas deur onoordeelkundige gebruik.
Honiball sê die boere wat lede van die Nyl-aksiegroep is, se waterregte is by die Departement van Water en Sanitasie geregistreer. Hy sê Sylvania se aanspraak op omgewingstoelating op grond van die argument dat boere die waterbron oorbenut, is “verregaande”.
Mnr. Ben Greeff, die provinsia- le landboudepartement se beplanner van landbou, ontwikkeling en grondgebruik in die Waterberg, meen Sylvania ignoreer die impak wat die myn op die gemeenskap en die natuurlike hulpbronne sal hê. Volgens hom is Sylvania se interpretasie van die Grondwet eensydig wanneer daar verwys word na die staat se verantwoordelikheid om maatskaplike en ekonomiese regte te beskerm.
Jordaan vra dat die departement van omgewingsake die “eensydige en ongegronde veronderstellings” van partye wat die mynaansoek teenstaan, ignoreer en omgewingstoestemming aan Sylvania toestaan.
–