MALEMA-PROKUREUR SLAAN NOU KITAAR BY ZEBEDIELA SITRUS
KORT ná ’n hofgeding van R4,3 miljoen wat daartoe gelei het dat die Bjatladi-gemeenskap sy bestuursvennote in die Zebedielasitruslandgoed buite Mokopane uitgekoop het, kla van die Bjatladi’s nou dat mnr. Tumi Mokwena, hul regsverteenwoordiger, hul onderneming gekaap het.
Die gemeenskap het die landgoed in 1999 bekom ná ’n grondeis en het sedertdien verskeie bestuursvennote gehad in wat eens Suid-Afrika se grootste sitruslandgoed was. Die laaste vennoot was Henley Farming Property (HFP) wat sitrusverbouing op die landgoed sedert 2000 bestuur het.
Die verhouding het egter gaandeweg verbrokkel tot op die punt waar bedrywighede verlede jaar tydens oestyd tot stilstand gedwing is. Die gemeenskap het onder meer ’n siviele geding teen die HFP en die landgoed se werkerstrust vir beweerde wanbestuur
en bedrog aanhangig gemaak. Mokwena, toe die Bjatladi-gemeenskap se regsverteenwoordiger, het die HFP se regspan egter glo genader met ’n versoek om buite die hof te skik.
Ingevolge die ooreenkoms sou die Bjatladi-gemeenskap die HFP se aandele in Zebediela Sitrus Bpk. teen 30 Junie vanjaar koop.
City Press berig dat Mokwena op die een of ander manier ’n aandeel in die onderneming bekom het en as die direkteur aangedui word. Mnr. Ike Kekana, seun van een van die begunstigdes, sê Mokwena was die een oomblik nog die gemeenskap se regsverteenwoordiger.
Nou woon hy op die landgoed en noem homself die besturende direkteur. Luidens Cipro (die kommissie vir maatskappy- en intellektuele eiendomsreg) is Mokwena reeds sedert Mei ’n direkteur van Zebediela Sitrus.
Kekana het aan die media gesê die landgoed se werkers word nie meer betyds betaal nie en daar is geen deursigtigheid in die onderneming se geldsake nie.
Mokwena, wat mnr. Julius Malema, leier van die EFF, in sy hofgeding teen die SA Inkomstediens verteenwoordig het, kon nie vir kommentaar bereik word nie.
–