Moenie belangrike seine van kredietagentskappe ignoreer
Hoewel Suid-Afrika se kredietgradering nie verander is nie, is die vooruitsig na negatief verander. Met die oog op die toekoms moet Suid-Afrika se regeringskuld stabiliseer (en nie styg nie). Groter beleidsekerheid is nodig.
KREDIETGRADERINGS deur agentskappe, soos Moody’s, Fitch en Standard & Poor, is belangrik, want dit gee ’n aanduiding aan beleggers van ’n land se vermoë om sy skuld terug te betaal.
Suid-Afrika se kredietgradering is tans net bo sub-beleggingsgraad, met ’n negatiewe vooruitsig. Indien ons in die toekoms afgegradeer word na sub-beleggingsgraad, gaan dit duurder word om geld oorsee te leen. Dit sal moeiliker wees om ons internasionale skuldverpligtinge na te kom en die Internasionale Monetêre Fonds mag dalk ingryp.
Landbou-uitvoer lewer ’n belangrike bydrae om buitelandse valuta te verdien met ’n swakker wordende rand. Produsente se aandeel in die oorsese verbruikersrand in lande waar ekonomiese groei sterker is, moet voortdurend vergroot. In die plaaslike mark oorheers bevolkingsgroei die ekonomiese groei- koers, wat beteken die plaaslike verbruiker word al hoe armer. Surplusproduksie loop saam met groter doeltreffendheid en produktiwiteit. Daarom is die uitvoermark en ’n gesonde finansiële sake-omgewing vir produsente so belangrik.
INFLASIE
Voeselprysinflasie het tot 11,7% toegeneem, maar die siening is dat dit ’n hoogtepunt bereik het en voortaan sal begin daal.
Dit is bemoedigend dat die rand teen sterker vlakke bly verhandel. Dit maak invoer goedkoper en beperk inflasie. Die Reserwebank het ’n mandaat om inflasie in ’n band van 3-6% te bestuur. Indien algemene inflasie bo 6% styg tot die huidige vlakke van 6,6%, kan dit ’n verhoging in rentekoerse meebring.
Die vooruitsig is egter dat inflasietoestande sonder die ingryping van ’n rentekoers- verhoging sal verbeter.
Die verwagting is dat oorkoepelende inflasie teen 6,6% ’n hoogtepunt sal bereik, maar in so ’n mate sal herstel om reeds teen die einde van die tweede kwartaal volgende jaar teen of onder 6% te daal. Laer kommoditeits- en voedselpryse sal ’n belangrike bydrae lewer. Dit is waarom weervooruitsigte vir die aanplant van landboukommoditeite en die produksie van goedkoper voedsel tans so ’n belangrike rol op markte speel.
Die verwagting is egter dat internasionale risiko’s kan toeneem en nadelig op Suid-Afrika se ekonomie kan inwerk. Ons het ’n oop ekonomie, en oorsese fondse wat in- en uitvloei, lewer ’n groot bydrae tot ons kapitaalrekening en het ’n direkte invloed op die rand se waarde.
VOORUITSIGTE
’n Afgradering sal met hoër ren- tekoerse gepaardgaan. Saam met ’n swakker rand gaan dit moeilik wees om teen die huidige ekonomiese groei skuld terug te betaal.
Dit is belangrik om groter beleidsekerheid te kry. As Suid-Afrika politieke spanning die hoof kan bied, kan die Reserwebank dalk die repokoers volgende jaar met selfs 25 basispunte verlaag.
Fitch se kredietgradering het onveranderd gebly (BBB), maar die vooruitsig is na negatief (BBB-) verander (sien die TABEL1).
Kredietagentskappe – net soos beleggers – is besorg oor Suid-Afrika se politieke risiko’s, insluitende die standaard van regering en beleidmaking. Fitch meen ekonomiese groei volgende jaar kan tot 1,3% toeneem en in 2018 tot 2,1%. Suid-Afrikaanse verbruikers gaan voortaan bly verarm omdat bevolkingsgroei ekonomiese groei steeds oortref.
Moody’s het sy kredietgradering ook onveranderd gehou, maar sy vooruitsig vir Suid-Afrika na negatief verander. Die negatiewe vooruitsig is weens Suid-Afrika se lae ekonomiese groei van 0,5% vanjaar. Strukturele hervormings is nodig om handelsvertroue te verhoog en ’n toename in belegging in SuidAfrika te verseker om produktiwiteit in die ekonomie te verhoog. Een van die grootste uitdagings is dat Suid-Afrika se regeringskuld moet stabiliseer en nie verder verhoog nie. Groter beleidsekerheid is dus nodig vir ekonomiese groei, belegging en sakevertroue.