Vakbond, boere staan saam teen EU-hoender

DIE pluimveebedryf se voortgesette stryd teen ingevoerde hoendervleis het nou nuwe momentum gekry met die toetrede van die Food and Allied Workers’ Union (Fawu).

Dié vakbond het verlede week ’n beroep op die Regering gedoen om ’n handelsoorlog te verklaar om die ongelyke speelveld waarop die Suid-Afrikaanse pluimveebedryf met Europese lande moet meeding, gelyk te maak. Fawu het ’n petisie aan die Parlement oorhandig waarin hy onder meer eis dat: Die Parlement die Kabinet en die Ministerie van Handel en Nywerheid ondersteun in hul pogings om die storting van hoendervleis uit die Europese Unie (EU) te keer. ’n Ooreenkoms met die betrokke uitvoerlande aangegaan word wat sal verseker dat Suid-Afrikaanse hoenderprodukte die EU-mark betree en dat die Suid-Afrikaanse Regering terugslaan met soortgelyke tegniese versperrings en tariefvrye beskermingsmaatreëls as wat die EU gebruik. Onderhandelinge vinnig moet geskied om meer werksverliese te voorkom. Intussen het die Regering verlede week ’n verbod op hoendervleis uit Duitsland ingestel ná ’n waarskuwing deur die internasionale organisasie vir dieregesondheid (OIE) oor ’n uitbreking van die hoogs aansteeklike H5N8-voëlgriep in die EU. Daar is hoop dat dié maatreël tydelike verligting vir Suid-Afrikaanse hoenderprodusente kan bring.

30% OF MEER

Die pluimveebedryf se aansoek vroeër vanjaar by die Kommissie vir Internasionale Handelsadministrasie (Itac) om ’n beskermingsmaatreël teen ingevoerde hoenderstukke aan die been uit die EU te kry, het louwarm reaksie by die tariefowerheid ontlok. Die Itac het ’n tarief van slegs 13,4% by dr. Rob Davies, Minister van Handel en Nywerheid, aanbeveel.

Die pluimveebedryf sê egter ’n teenstortingstarief moet 30% of meer wees om ’n invloed te hê. “Ons glo nie enige tarief laer as 37% sal werk nie,” sê mnr. Kevin Lovell, uitvoerende hoof van die Suid-Afrikaanse Pluimveevereniging (SAPV).

Hy sê die EU-kommissie het bevestig dat Davies reeds aan hom geskryf het, maar teen druktyd het Davies nog nie sy besluit oor ’n tarief aangekondig nie. Lovell het verwag dat dit binnekort sou gebeur.

Hy sê vorige ervaring het gewys die enigste teenstortingstariewe wat gewerk het, was die 30% of meer wat teen Duitse maatskappye ingestel is.

VERBOD

Fawu en die genoteerde hoenderprodusent RCL Foods het die Regering se verbod op hoendervleis uit Duitsland verwelkom.

Suid-Afrika se reaksie is soortgelyk aan talle ander lande s’n, sê RCL Foods in ’n verklaring.

Volgens die maatskappy is die hoogs aansteeklike H5N8-stam die afgelope weke in agt Europese lande geïdentifiseer.

Hoewel die meeste voorvalle onder wilde voëls was, is maatreëls getref om te keer dat dit na die voedselbedryf versprei.

Ten spyte daarvan is H5N8 op ’n pluimveeplaas in Nederland gevind en 190 000 eende is toe van kant gemaak.

Volgens berigte het kalkoenen eendeplase in Duitsland en Hongarye ook uitbrekings gehad en is voëls van kant gemaak.

RCL Foods en Fawu vra om ’n tussentydse verbod op alle hoendervleisinvoer uit Europa totdat die krisis afgeweer is.

“Tienduisende ton hoender vleis word maandeliks in SuidAfrika gestort, en die EU is een van die hoofbronne,” het mnr. Stephen Heath, woordvoerder van RCL Foods, gesê.

MEDEDINGENDHEID

Mnr. Tinashe Kapuya, hoof van internasionale handels-en beleggingsintelligensie by die landbousakekamer Agbiz, het gesê as ’n bedryf nie die soort beskerming kry waarop hy gehoop het nie, kan hy nie dadelik weer teruggaan na die Itac nie. Hy moet vir ’n sekere tydperk wag voor hy ’n nuwe aansoek kan bring.

“Ons sal op Apap-inisiatiewe (die beleidsaksieplan vir die landbou) moet staatmaak om die bedryf te help oorleef,” het Kapuya gesê.

Dr. John Purchase, uitvoerende hoof van Agbiz, het gesê die Suid-Afrikaanse pluimveebedryf is weens die droogte en gepaardgaande hoë koste van voer onder groot druk.

“As ons weer ’n surplusmielieproduksie kan hê, sal dit ons braaihoenderbedryf sekerlik mededingender maak.”

Purchase het gesê mededingendheid moet altyd die maatstaf bly.

‘As ons weer ’n surplusmielieproduksie kan hê, sal dit ons braaihoenderbedryf sekerlik mededingender maak.’