Afrika bly ’n sleutelmark

AFRIKA sal na verwagting volgende jaar sentraal bly tot Suid-Afrikaanse landbou-uitvoer, ten spyte van ’n daling in uitvoer na Afrika-lande.

Afrika verteenwoordig sowat 45% van Suid-Afrika se totale landbou-uitvoer.

Mnr. Tinashe Kapuya (foto), hoof van internasionale handelsen beleggingsinligting by die landbousakekamer Agbiz, het in ’n aanbieding oor vooruitsigte vir aanstaande jaar gesê landbou-uitvoer as geheel het in vanjaar se eerste halfjaar weens die droogte gedaal.

Uitvoer na Afrika was 12% laer. In verlede jaar se eerste halfjaar was die waarde meer as 1,9 miljard Amerikaanse dollar, teenoor sowat 1,7 miljard vanjaar.

Hy het gesê dit was veral uitvoer na Afrika-lande met ekonomieë wat op olie gegrond is, wat geraak is. So het landbou-uitvoer na Angola met sowat 40% geval.

“Dit was ’n besonder slegte jaar vir Afrika-ekonomieë weens die drastiese verswakking van hul geldeenhede en die afswaai in kommoditeitspryse.”

Landbou-uitvoer na Europa, die Amerikas en die Midde-Ooste het gegroei.

EUROPA EN DIE OOSTE

Landbou-uitvoer na die Europese Unie (EU), wat in die eerste helfte van verlede jaar net meer as 1,2 miljard Amerikaanse dollar beloop het, het in vanjaar se eerste halfjaar met 3% gegroei.

Verdere groei word verwag danksy die nuwe ekonomiese vennootskapsooreenkoms tus- sen die Suider-Afrikaanse Doeane-unie (SADU) en die EU. Die groei kan egter beperk word deur nuwe sanitêre en fitosanitêre versperrings. Brexit-onderhandelinge sal waarskynlik nie ’n invloed op Suid-Afrikaanse uitvoer hê nie, maar sal onsekerhede meebring. Vooruitsigte lyk belowend, veral vir vars vrugte na Asië en die Midde-Ooste. Uitvoer na laasgenoemde het in die eerste halfjaar met 8% gestyg.

AMERIKA

Landbou-uitvoer na Amerika het in die halfjaar met 11% gegroei, veral kort ná die hernuwing van die Amerikaanse wet op groei en ontwikkeling in Afrika (Agoa).

Kapuya verwag nie dat Amerika dié wet sal herroep nie en ook nie dat ’n Amerikaanse administrasie onder Donald Trump sy verhoudinge met Suid-Afrika en die streek sal verander nie.

“Die verwagting is dat Suid-Afrika op medium- tot lang termyn sy marktoegang sal behou, ondanks die moontlikheid van buite-siklus-hersienings (van Suid-Afrika se Agoa-deelname).”

Kapuya sê hy kry die indruk Amerika sou graag ’n bilaterale ooreenkoms met Suid-Afrika wou hê, maar vir Suid-Afrika en die streek is daar voordele as die SADU met Amerika onderhandel.

Die invoertarief op soja-oliekoek uit die Suid-Amerikaanse handelsblok is met 1,65% verlaag, en kwotas is toegewys vir bevrore beesvleissnitte, sojabone en soja- en sonneblomolie.

–

‘Dit was ’n besonder slegte jaar vir Afrikaekonomieë weens die drastiese verswakking van hul geldeenhede.’