ROBERTSON-STAKING NÁ 13 WEKE EINDELIK VERBY
DIE uitgerekte staking by die botteleringsaanleg Robertson Winery is verby danksy ’n skikkingsooreenkoms wat vir drie jaar geld.
Luidens die ooreenkoms, wat op 23 November bereik is, sal alle werknemers ’n verhoging van 8% of R400 – watter een ook al die grootste is – ontvang. Die vakunie Commercial, Stevedoring, Agricultural and Allied Workers’ Union (CSAAWU) het die werkers verteenwoordig.
Mnr. Anton Cilliers, die maatskappy se besturende direkteur, sê die nuwe koste van indiensneming is R4 263,56 per
’n Verhoging van die verbruikersprysindeks (VPI) plus 1,5% word volgende jaar toegestaan, en die VPI plus 1% in 2018.
Sake verloop sedert Maandag 28 November weer soos gewoonlik, sê me. Reinette Jordaan, menslikehulpbronbestuurder.
“Ons het net vier weke oor tot Kersfees, so hierdie is ons besigste tyd van die jaar.”
NUWE BEGIN
Die stakers was fabriekswerkers,
en nie plaaswerkers nie, soos die CSAAWU soms te kenne gegee het nie. Jordaan sê albei partye is daartoe verbind om verhoudings te herstel.
“Daar was vir drie maande lank letterlik gevegte. Alles gaan nie oornag weer maanskyn en rosegeur wees nie. Hier en daar is nog spanning en daar is baie wanpersepsies wat nog uitgesorteer moet word. Ons gaan waarskynlik deur die Kommissie vir Versoening, Bemiddeling en Arbitrasie ’n proses volg om
weer verhoudings op te bou.”
’n Deel van die skikkingsooreenkoms is dat geen dissiplinêre stappe teen stakers gedoen sal word nie.
“Ons wil op ’n skoon lei begin,” sê Jordaan.
Volgens Cilliers bly die aanleg toegewyd daartoe om die lewens van al hul werkers te verbeter.
Robertson Winery bied steeds aan sy werkers toegang tot gratis mediese geriewe, behuisingslenings en subsidies waar dit van toepassing is, asook ekonomiese
bemagtiging vir die gemeenskap op ’n breër grondslag.
Landbouweekblad het in 2010 berig oor Robertson Winery se inisiatief om die plaas Constitution Road na ’n trust oor te dra, waarvan 66% aan 183 vroulike plaaswerkers behoort
TYDELIKE WERKERS
Jordaan sê die botteleringsaanleg kon tydens die staking daarin slaag om sy markte te bedien danksy ’n “magdom tydelike werkers”.
“Dit was ’n probleem om sonder die kundiges op die perseel voort te gaan en dinge het stadiger gegaan as gewoonlik, maar ons het dit reggekry. Ons staan in groot dankbaarheid teenoor die tydelike werkers. Sonder hulle sou ons baie swaar gekry het.”
Jordaan sê Robertson Winery het baie empatie met die werkers wat gestaak het.
“Die mense het swaar gekry. Om vir drie maande lank nie ’n inkomste te hê nie, is nie ’n grap nie.”
Mnr. Karel Swart, adjunkalgemene sekretaris van CSAAWU, kon nie teen druktyd vir kommentaar bereik word nie. Die unie het aanvanklik op ’n 150%-verhoging aangedring
Dit kom neer op ’n minimum loon van R8 500 en die unie het geëis dat dit terugwerkend vanaf 1 Mei moet geld. Cilliers sê dit was “onwaarskynlik en onmoontlik” om te oorweeg.
Robertson Winery het van die begin af ’n 8%-verhoging aangebied.