Landbou kan Afrika se enjin wees
INDIEN Afrika nie self inspring en sy grond op ’n kommersiële grondslag bewerk nie, sal die Chinese of Indiërs dit vir hom kom doen.
Dít was mnr. Omri van Zyl, uitvoerende hoof van Agri SA, se waarskuwing aan kongresgangers op die beleggingsindaba vir die landbou in Afrika in Kaapstad.
Suid-Afrika is in ’n ideale posisie om die wegspringplek vir Afrika te wees om die “broodmandjie” van die wêreld te word. Om dit te vermag, sal dit egter op ’n praktiese manier gedoen moet word, sê hy. Een manier is om swart boere voor te berei om kommersiële boere te word.
“Die meeste Afrika-lande het sedert 1965 onafhanklik geraak.
“Ons is nou 50 jaar verder en ons is nog steeds ’n netto invoerder van kos. Die meeste boere in Afrika is kleinboere. So, iewers maak iets nie sin nie.”
FINANSIERING
Van Zyl sê toegang tot finansiering kelder hierdie boere se vooruitgang.
“Hulle kry nie toegang tot finansiering nie, want hulle besit niks. Aangesien hulle nie toegang tot finansiering kry nie, kan hulle niks verseker nie. Dit beteken een haelstorm kan dié boere heeltemal vernietig.”
Dit is om hierdie rede dat boere op ’n kommersiële grondslag moet boer.
“Ons het genoeg grond in Afrika om op groot skaal te kan boer. Ons het ook genoeg vaardighede in Suid-Afrika om nuwe boere te help om hulle kommersieel te vestig.”
Dit is bekend dat baie kleinboere in Afrika deur skenkers gefinansier word. Wanneer die skenker-organisasies hul geld aan ’n land onttrek, val die boerderyprojekte plat.
Van Zyl het gesê die produksiekoste vir boerdery in Suid-Afrika is R130 miljard per jaar, wat deur banke toegestaan word. Boere kan hierdie roete volg omdat hulle die geld teen hul eiendom kan bekom.
NUWE BOERE
Om nuwe boere gevestig te kry, stel hy voor die Regering moet ’n ontwikkelingsfinansieringsfonds op die been bring en ook toelaat dat die nuwe boere hul grond besit.
Dr. Nigel Chanakira, voorsitter van die Zimbabwiese beleggingsowerheid, het gesê daar is ’n behoefte in Zimbabwe dat die grond wat die staat vir 99 jaar uitverhuur vir bewerking, gekommersialiseer moet word. Hy het gesê die staat het inisiatiewe om vennootskappe met boere te smee ten einde landbouproduksie in dié land te verhoog.
–
‘Die meeste Afrika-lande het sedert 1965 onafhanklik geraak. Ons is nou 50 jaar verder en ons is steeds ’n netto invoerder van kos.’