’BOERE MOET HUL STORIES VERTEL’
SLIMFOON-TEGNOLOGIE en sosiale media kan dieselfde vir boerderye doen as wat dit reeds vir kommunikasie, vervoer en ander noodsaaklike dienste gedoen het.
Dit was die boodskap van die media-entrepreneur me. Khanyi Dhlomo, uitvoerende hoof van Ndalo Media, op die produsente-organisasie Subtrop se onlangse bemarking simposium in Nelspruit.
Dhlomo het daarop gewys dat die vervoerdiens Uber byvoorbeeld hand aan hand met sosiale media funksioneer.
Sy waarsku dat maatskappye wat nie só met hul kliënte kontak maak nie, nie in die toekoms gaan voortbestaan nie.
WEES SOOS UBER
Uber verbind met sy slim foontoepassing mense wat vervoer nodig het, met bestuurders in private motors. Die koste beloop min of meer dieselfde as ’n taxi, maar geen kontant is betrokke nie. Die slimfoon-toep bereken self die koste en dit word outomaties van die kliënt se kredietkaart afgetrek.
UberFresh en UberEats lewer kos op dieselfde beginsel by kliënte af. Dit kan in die toekoms dus moontlik wee som’ n vars produkte mandjie direk by die boer te bestel.
Om dit reg te kry, gaan boere moet bemark en weet hoe verbruikers verkies om hul inligting te kry en watter inligting hulle wil hê. Om bloot ’n produk te adverteer, is nie meer goed genoeg nie; dit gaan oor die storie agter die produk en die verband tussen die produsent en sy mark.
“Mense weet wat hulle wil hê. Hulle wil hoor wat jy, die produsent, daaroor sê, hoe jy dit produseer en hoe jy as boer teenoor die verbruiker ingestel is.”
RELEVANT
Dhlomo sê die sleutel tot bemarking is slimfone en tablette.
“Van die meer as 2 miljoen mense wat Ndalo Media daagliks bereik, vind 70% van die kontak deur sosiale media op mobiele slimtoestelle plaas.”
Sy meen boere moet dus hul stories oor sosiale netwerke aan hul teikenmarkte oordra, verkieslik met videogrepe en slim visuele aanbiedings.
Sy sê om dit doeltreffend te doen, moet boere self bewus raak van wat op sosiale media aangaan en aan maniere dink om hul eie storie en produkte relevant tot die onderwerp van die dag te maak en dit só aan te bied.
Verbruikers raak ook al hoe meer gesteld op die onderliggende waardes van maatskappye en sal eerder ’n produk koop as hulle weet dat die vervaardigingsproses met ’n sin van verantwoordelikheid teenoor werkers, gemeenskappe en die aarde bedryf word.
“Dit is die tipe stories wat julle moet vertel,” sê Dhlomo.
–
‘Mense weet wat hulle wil hê. Hulle wil hoor wat jy, die produsent, daaroor sê.’