WOL PRESTEER PUIK
’N ONTLEDING deur die Australiese markontledingsmaatskappy Mecardo toon dat die gemiddelde wolprys in Amerikaanse dollar, bereken oor die afgelope vyf jaar, veel hoër as dié van mededingende vesels was.
Die beste presteerders was Merino-kaardwol, gevolg deur Merino-kamwol. Katoen is derde, terwyl die kunsvesels (soos poliëster en akriel) naby die onderpunt van die lys is. Die laer olieprys sedert 2014 het die prys van kunsvesels aanmerklik laat daal.
Hoewel katoenpryse vergeleke met dié van ander vesels taamlik hoog is, is dit steeds veel laer as die prys van wol. Wol is tans 10,2 keer duurder as katoen. Die vraag is of wol dié hoë vlak sal kan handhaaf en of dit te duur vir die mark kan raak.
Mecardo sê ’n belangrike faktor vir wol se goeie vertoning teenoor ander vesels is die betreklik klein aanbod. Katoenpryse het ook begin styg, wat voorts die risiko dat wol te duur kan raak, sal verlaag.
NEIGING
Volgens Mecardo is daar nog baie beweegruimte vir wolpryse om verder te styg. Volgens ontledings is die gemiddelde prys vir wol in Amerikaanse dollar tans 33% hoër as die laagste sikliese vlakke van die afgelope vyf jaar. Die geskiedenis toon dat die gevaarligte begin flikker wanneer pryse 80% en meer hoër is as die laagste vlakke van die vorige vyf jaar.
Een van die grootste stygings was in 1973 toe wolpryse (in Australiese dollar bereken) met 400% teenoor hul laagste vlakke van die vorige vyf jaar gestyg het. Tydens die hoogtepunte in 1988, 1994-’95 en 2002 was pryse 140% tot 180% hoër as die laagste vlakke van die vorige vyf jaar.
Die prysstygings in 1997, 2008 en 2011 was meer gematig en het gewissel van 80% tot 100% (in Australiese dollar) teenoor die laagtepunte van die vorige vyf jaar.
Die Merinowolprys (in Australiese dollar) is tans net 50% bo die laagste vlak van die afgelope vyf jaar.
Mecardo kom tot die gevolgtrekking dat die huidige prysvlakke eintlik baie na aan die sikliese laagtepunt van verlede jaar is en dat daar geen rede tot kommer is nie.